11. сан̇га̄равасуттам̣

207. са̄ваттхинида̄нам̣. тена кхо пана самайена сан̇га̄раво на̄ма бра̄хман̣о са̄ваттхийам̣ пат̣ивасати удакасуддхико, удакена парисуддхим̣ паччети, са̄йам̣ па̄там̣ удакорохана̄нуйогамануйутто вихарати. атха кхо а̄йасма̄ а̄нандо пуббан̣хасамайам̣ нива̄сетва̄ паттачӣварама̄да̄йа са̄ваттхим̣ пин̣д̣а̄йа па̄виси. са̄ваттхийам̣ пин̣д̣а̄йа чаритва̄ паччха̄бхаттам̣ пин̣д̣апа̄тапат̣икканто йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ а̄нандо бхагавантам̣ етадавоча – ‘‘идха, бханте, сан̇га̄раво на̄ма бра̄хман̣о са̄ваттхийам̣ пат̣ивасати удакасуддхико, удакена суддхим̣ паччети, са̄йам̣ па̄там̣ удакорохана̄нуйогамануйутто вихарати. са̄дху, бханте, бхагава̄ йена сан̇га̄равасса бра̄хман̣асса нивесанам̣ тенупасан̇камату анукампам̣ упа̄да̄йа̄’’ти. адхива̄сеси бхагава̄ тун̣хӣбха̄вена.

атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа йена сан̇га̄равасса бра̄хман̣асса нивесанам̣ тенупасан̇ками; упасан̇камитва̄ пан̃н̃атте а̄сане нисӣди. атха кхо сан̇га̄раво бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисиннам̣ кхо сан̇га̄равам̣ бра̄хман̣ам̣ бхагава̄ етадавоча – ‘‘саччам̣ кира твам̣, бра̄хман̣а, удакасуддхико, удакена суддхим̣ паччеси, са̄йам̣ па̄там̣ удакорохана̄нуйогамануйутто вихарасӣ’’ти? ‘‘евам̣, бхо готама’’. ‘‘ким̣ пана твам̣, бра̄хман̣а, аттхавасам̣ сампассама̄но удакасуддхико, удакасуддхим̣ паччеси, са̄йам̣ па̄там̣ удакорохана̄нуйогамануйутто вихарасӣ’’ти? ‘‘идха ме, бхо готама [идха ме бхо готама ахам̣ (пӣ. ка.)], йам̣ дива̄ па̄пакаммам̣ катам̣ хоти, там̣ са̄йам̣ нха̄нена [наха̄нена (сӣ. сйа̄. кам̣. пӣ.)] пава̄хеми, йам̣ раттим̣ па̄пакаммам̣ катам̣ хоти там̣ па̄там̣ нха̄нена пава̄хеми. имам̣ кхва̄хам̣, бхо готама, аттхавасам̣ сампассама̄но удакасуддхико, удакена суддхим̣ паччеми, са̄йам̣ па̄там̣ удакорохана̄нуйогамануйутто вихара̄мӣ’’ти.

‘‘дхаммо рахадо бра̄хман̣а сӣлатиттхо,

ана̄вило саббхи сатам̣ пасаттхо;

йаттха хаве ведагуно сина̄та̄,

аналлагатта̄ва [аналлӣнагатта̄ва (ка.)] таранти па̄ра’’нти.

евам̣ вутте, сан̇га̄раво бра̄хман̣о бхагавантам̣ етадавоча – ‘‘абхиккантам̣, бхо готама, абхиккантам̣, бхо готама…пе… упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти.