12. кхомадуссасуттам̣

208. евам̣ ме сутам̣ – екам̣ самайам̣ бхагава̄ саккесу вихарати кхомадуссам̣ на̄мам̣ сакйа̄нам̣ нигамо. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа кхомадуссам̣ нигамам̣ пин̣д̣а̄йа па̄виси. тена кхо пана самайена кхомадуссака̄ бра̄хман̣агахапатика̄ сабха̄йам̣ саннипатита̄ хонти кеначидева каран̣ӣйена, дево ча екамекам̣ пхуса̄йати. атха кхо бхагава̄ йена са̄ сабха̄ тенупасан̇ками. аддасам̣су кхомадуссака̄ бра̄хман̣агахапатика̄ бхагавантам̣ дӯратова а̄гаччхантам̣. дисва̄на етадавочум̣ – ‘‘ке ча мун̣д̣ака̄ саман̣ака̄, ке ча сабха̄дхаммам̣ джа̄ниссантӣ’’ти? атха кхо бхагава̄ кхомадуссаке бра̄хман̣агахапатике га̄тха̄йа аджджхабха̄си –

‘‘неса̄ сабха̄ йаттха на санти санто,

санто на те йе на ваданти дхаммам̣;

ра̄ган̃ча досан̃ча паха̄йа мохам̣,

дхаммам̣ ваданта̄ ча бхаванти санто’’ти.

евам̣ вутте, кхомадуссака̄ бра̄хман̣агахапатика̄ бхагавантам̣ етадавочум̣ – ‘‘абхиккантам̣, бхо готама, абхиккантам̣, бхо готама; сеййатха̄пи, бхо готама, никкуджджитам̣ ва̄ уккуджджеййа, пат̣иччханнам̣ ва̄ вивареййа, мӯл̣хасса ва̄ маггам̣ а̄чиккхеййа, андхака̄ре ва̄ телападжджотам̣ дха̄реййа – чаккхуманто рӯпа̄ни даккхантӣти, евамевам̣ бхота̄ готамена анекапарийа̄йена дхаммо пака̄сито. ете майам̣ бхавантам̣ готамам̣ саран̣ам̣ гаччха̄ма дхамман̃ча бхиккхусан̇гхан̃ча. упа̄саке но бхавам̣ готамо дха̄рету аджджатагге па̄н̣упете саран̣ам̣ гате’’ти.

упа̄сакавагго дутийо.

тассудда̄нам̣ –

каси удайо девахито, ан̃н̃атарамаха̄са̄лам̣;

ма̄натхаддхам̣ паччанӣкам̣, навакаммикакат̣т̣хаха̄рам̣;

ма̄тупосакам̣ бхиккхако, сан̇га̄раво ча кхомадуссена два̄даса̄ти.

бра̄хман̣асам̣йуттам̣ саматтам̣.