8. кат̣т̣хаха̄расуттам̣

204. екам̣ самайам̣ бхагава̄ косалесу вихарати ан̃н̃атарасмим̣ ванасан̣д̣е. тена кхо пана самайена ан̃н̃атарасса бха̄радва̄джаготтасса бра̄хман̣асса самбахула̄ антева̄сика̄ кат̣т̣хаха̄рака̄ ма̄н̣авака̄ йена ванасан̣д̣о тенупасан̇камим̣су; упасан̇камитва̄ аддасам̣су бхагавантам̣ тасмим̣ ванасан̣д̣е нисиннам̣ паллан̇кам̣ а̄бхуджитва̄ уджум̣ ка̄йам̣ пан̣идха̄йа паримукхам̣ сатим̣ упат̣т̣хапетва̄. дисва̄на йена бха̄радва̄джаготто бра̄хман̣о тенупасан̇камим̣су; упасан̇камитва̄ бха̄радва̄джаготтам̣ бра̄хман̣ам̣ етадавочум̣ – ‘‘йаггхе, бхавам̣ джа̄неййа̄си! асукасмим̣ ванасан̣д̣е саман̣о нисинно паллан̇кам̣ а̄бхуджитва̄ уджум̣ ка̄йам̣ пан̣идха̄йа паримукхам̣ сатим̣ упат̣т̣хапетва̄’’. атха кхо бха̄радва̄джаготто бра̄хман̣о техи ма̄н̣авакехи саддхим̣ йена со ванасан̣д̣о тенупасан̇ками. аддаса̄ кхо бхагавантам̣ тасмим̣ ванасан̣д̣е нисиннам̣ паллан̇кам̣ а̄бхуджитва̄ уджум̣ ка̄йам̣ пан̣идха̄йа паримукхам̣ сатим̣ упат̣т̣хапетва̄. дисва̄на йена бхагава̄ тенупасан̇ками; упасан̇камитва̄ бхагавантам̣ га̄тха̄йа аджджхабха̄си –

‘‘гамбхӣрарӯпе бахубхераве ване,

сун̃н̃ам̣ аран̃н̃ам̣ виджанам̣ вига̄хийа;

анин̃джама̄нена т̣хитена ваггуна̄,

суча̄рурӯпам̣ вата бхиккху джха̄йаси.

‘‘на йаттха гӣтам̣ напи йаттха ва̄дитам̣,

еко аран̃н̃е ванавассито муни;

аччхерарӯпам̣ пат̣ибха̄ти мам̣ идам̣,

йадекако пӣтимано ване васе.

‘‘ман̃н̃а̄махам̣ лока̄дхипатисахабйатам̣,

а̄кан̇кхама̄но тидивам̣ ануттарам̣;

касма̄ бхавам̣ виджанамаран̃н̃амассито,

тапо идха куббаси брахмапаттийа̄’’ти.

‘‘йа̄ ка̄чи кан̇кха̄ абхинандана̄ ва̄,

анекадха̄тӯсу путхӯ сада̄сита̄;

ан̃н̃а̄н̣амӯлаппабхава̄ паджаппита̄,

сабба̄ майа̄ бйантиката̄ самӯлика̄.

‘‘сва̄хам̣ акан̇кхо асито анӯпайо,

саббесу дхаммесу висуддхадассано;

паппуййа самбодхимануттарам̣ сивам̣,

джха̄йа̄махам̣ брахма рахо виса̄радо’’ти.

евам̣ вутте, бха̄радва̄джаготто бра̄хман̣о бхагавантам̣ етадавоча – ‘‘абхиккантам̣, бхо готама абхиккантам̣, бхо готама…пе… аджджатагге па̄н̣упетам̣ саран̣ам̣ гата’’нти.