7. навакаммикасуттам̣

203. екам̣ самайам̣ бхагава̄ косалесу вихарати ан̃н̃атарасмим̣ ванасан̣д̣е. тена кхо пана самайена навакаммикабха̄радва̄джо бра̄хман̣о тасмим̣ ванасан̣д̣е каммантам̣ ка̄ра̄пети. аддаса̄ кхо навакаммикабха̄радва̄джо бра̄хман̣о бхагавантам̣ ан̃н̃атарасмим̣ са̄ларуккхамӯле нисиннам̣ паллан̇кам̣ а̄бхуджитва̄ уджум̣ ка̄йам̣ пан̣идха̄йа паримукхам̣ сатим̣ упат̣т̣хапетва̄. дисва̄насса етадахоси – ‘‘ахам̣ кхо имасмим̣ ванасан̣д̣е каммантам̣ ка̄ра̄пенто рама̄ми. айам̣ саман̣о готамо ким̣ ка̄ра̄пенто раматӣ’’ти? атха кхо навакаммикабха̄радва̄джо бра̄хман̣о йена бхагава̄ тенупасан̇ками. упасан̇камитва̄ бхагавантам̣ га̄тха̄йа аджджхабха̄си –

‘‘ке ну камманта̄ карӣйанти, бхиккху са̄лаване тава;

йадекако аран̃н̃асмим̣, ратим̣ виндати готамо’’ти.

‘‘на ме ванасмим̣ каран̣ӣйаматтхи,

уччхиннамӯлам̣ ме ванам̣ висӯкам̣;

сва̄хам̣ ване ниббанатхо висалло,

еко раме аратим̣ виппаха̄йа̄’’ти.

евам̣ вутте, навакаммикабха̄радва̄джо бра̄хман̣о бхагавантам̣ етадавоча – ‘‘абхиккантам̣, бхо готама…пе… упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти.