6. паччанӣкасуттам̣

202. са̄ваттхинида̄нам̣. тена кхо пана самайена паччанӣкаса̄то на̄ма бра̄хман̣о са̄ваттхийам̣ пат̣ивасати. атха кхо паччанӣкаса̄тасса бра̄хман̣асса етадахоси – ‘‘йам̣нӯна̄хам̣ йена саман̣о готамо тенупасан̇камеййам̣. йам̣ йадева саман̣о готамо бха̄сиссати там̣ тадевасса̄хам̣ [тадева са̄хам̣ (ка.)] паччанӣка̄сса’’нти [паччанӣкассанти (пӣ.), паччанӣкаса̄танти (ка.)]. тена кхо пана самайена бхагава̄ аббхока̄се чан̇камати. атха кхо паччанӣкаса̄то бра̄хман̣о йена бхагава̄ тенупасан̇ками; упасан̇камитва̄ бхагавантам̣ чан̇камантам̣ етадавоча – ‘бхан̣а саман̣адхамма’нти.

‘‘на паччанӣкаса̄тена, сувиджа̄нам̣ субха̄ситам̣;

упаккилит̣т̣хачиттена, са̄рамбхабахулена ча.

‘‘йо ча винеййа са̄рамбхам̣, аппаса̄дан̃ча четасо;

а̄гха̄там̣ пат̣иниссаджджа, са ве [саче (сйа̄. кам̣. ка.)] джан̃н̃а̄ субха̄сита’’нти.

евам̣ вутте, паччанӣкаса̄то бра̄хман̣о бхагавантам̣ етадавоча – ‘‘абхиккантам̣, бхо готама, абхиккантам̣, бхо готама…пе… упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти.