2. удайасуттам̣

198. са̄ваттхинида̄нам̣. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа йена удайасса бра̄хман̣асса нивесанам̣ тенупасан̇ками. атха кхо удайо бра̄хман̣о бхагавато паттам̣ оданена пӯреси. дутийампи кхо бхагава̄ пуббан̣хасамайам̣ нива̄сетва̄ паттачӣварама̄да̄йа йена удайасса бра̄хман̣асса нивесанам̣ тенупасан̇ками…пе… татийампи кхо удайо бра̄хман̣о бхагавато паттам̣ оданена пӯретва̄ бхагавантам̣ етадавоча – ‘‘пакат̣т̣хакойам̣ саман̣о готамо пунаппунам̣ а̄гаччхатӣ’’ти.

‘‘пунаппунан̃чева вапанти бӣджам̣, пунаппунам̣ вассати девара̄джа̄;

пунаппунам̣ кхеттам̣ касанти кассака̄, пунаппунам̣ дхан̃н̃амупети рат̣т̣хам̣.

‘‘пунаппунам̣ йа̄чака̄ йа̄чайанти, пунаппунам̣ да̄напатӣ даданти;

пунаппунам̣ да̄напатӣ дадитва̄, пунаппунам̣ саггамупенти т̣ха̄нам̣.

‘‘пунаппунам̣ кхӣраника̄ духанти, пунаппунам̣ ваччхо упети ма̄тарам̣;

пунаппунам̣ киламати пхандати ча, пунаппунам̣ габбхамупети мандо.

‘‘пунаппунам̣ джа̄йати мӣйати ча, пунаппунам̣ сиватхикам̣ [сӣватхикам̣ (сӣ. сйа̄. кам̣. пӣ.)] харанти;

магган̃ча ладдха̄ апунаббхава̄йа, на пунаппунам̣ джа̄йати бхӯрипан̃н̃о’’ти [пунаппунам̣ джа̄йати бхӯрипан̃н̃оти (сйа̄. кам̣. ка.)].

евам̣ вутте, удайо бра̄хман̣о бхагавантам̣ етадавоча – ‘‘абхиккантам̣, бхо готама…пе… упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти.