3. девахитасуттам̣

199. са̄ваттхинида̄нам̣. тена кхо пана самайена бхагава̄ ва̄теха̄ба̄дхико хоти; а̄йасма̄ ча упава̄н̣о бхагавато упат̣т̣ха̄ко хоти. атха кхо бхагава̄ а̄йасмантам̣ упава̄н̣ам̣ а̄мантеси – ‘‘ин̇гха ме твам̣, упава̄н̣а, ун̣ходакам̣ джа̄на̄хӣ’’ти. ‘‘евам̣, бханте’’ти кхо а̄йасма̄ упава̄н̣о бхагавато пат̣иссутва̄ нива̄сетва̄ паттачӣварама̄да̄йа йена девахитасса бра̄хман̣асса нивесанам̣ тенупасан̇ками; упасан̇камитва̄ тун̣хӣбхӯто екамантам̣ ат̣т̣ха̄си. аддаса̄ кхо девахито бра̄хман̣о а̄йасмантам̣ упава̄н̣ам̣ тун̣хӣбхӯтам̣ екамантам̣ т̣хитам̣. дисва̄на а̄йасмантам̣ упава̄н̣ам̣ га̄тха̄йа аджджхабха̄си –

‘‘тун̣хӣбхӯто бхавам̣ тит̣т̣хам̣, мун̣д̣о сан̇гха̄т̣ипа̄руто;

ким̣ паттхайа̄но ким̣ есам̣, ким̣ ну йа̄читума̄гато’’ти.

‘‘арахам̣ сугато локе, ва̄теха̄ба̄дхико муни;

саче ун̣ходакам̣ аттхи, мунино дехи бра̄хман̣а.

‘‘пӯджито пӯджанеййа̄нам̣, саккареййа̄на саккато;

апачито апачеййа̄нам̣ [апачинеййа̄нам̣ (сӣ. сйа̄. кам̣.) т̣ӣка̄ олокетабба̄], тасса иччха̄ми ха̄таве’’ти.

атха кхо девахито бра̄хман̣о ун̣ходакасса ка̄джам̣ пурисена га̄ха̄петва̄ пха̄н̣итасса ча пут̣ам̣ а̄йасмато упава̄н̣асса па̄да̄си. атха кхо а̄йасма̄ упава̄н̣о йена бхагава̄ тенупасан̇ками; упасан̇камитва̄ бхагавантам̣ ун̣ходакена нха̄петва̄ [наха̄петва̄ (сӣ. пӣ.)] ун̣ходакена пха̄н̣итам̣ а̄лолетва̄ бхагавато па̄да̄си. атха кхо бхагавато а̄ба̄дхо пат̣иппассамбхи.

атха кхо девахито бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо девахито бра̄хман̣о бхагавантам̣ га̄тха̄йа аджджхабха̄си –

‘‘каттха даджджа̄ деййадхаммам̣, каттха диннам̣ махаппхалам̣;

катхан̃хи йаджама̄насса, катхам̣ иджджхати даккхин̣а̄’’ти.

‘‘пуббенива̄сам̣ йо ведӣ, сагга̄па̄йан̃ча пассати;

атхо джа̄тиккхайам̣ патто, абхин̃н̃а̄восито муни.

‘‘еттха даджджа̄ деййадхаммам̣, еттха диннам̣ махаппхалам̣;

еван̃хи йаджама̄насса, евам̣ иджджхати даккхин̣а̄’’ти.

евам̣ вутте, девахито бра̄хман̣о бхагавантам̣ етадавоча – ‘‘абхиккантам̣ бхо готама…пе… упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти.