1. касибха̄радва̄джасуттам̣

197. евам̣ ме сутам̣ – екам̣ самайам̣ бхагава̄ магадхесу вихарати даккхин̣а̄гирисмим̣ екана̄л̣а̄йам̣ бра̄хман̣ага̄ме. тена кхо пана самайена касибха̄радва̄джасса [касикабха̄радва̄джасса (ка.)] бра̄хман̣асса пан̃чаматта̄ни нан̇галасата̄ни пайутта̄ни хонти ваппака̄ле. атха кхо бхагава̄ пуббан̣хасамайам̣ нива̄сетва̄ паттачӣварама̄да̄йа йена касибха̄радва̄джасса бра̄хман̣асса камманто тенупасан̇ками.

тена кхо пана самайена касибха̄радва̄джасса бра̄хман̣асса паривесана̄ ваттати. атха кхо бхагава̄ йена паривесана̄ тенупасан̇ками; упасан̇камитва̄ екамантам̣ ат̣т̣ха̄си. аддаса̄ кхо касибха̄радва̄джо бра̄хман̣о бхагавантам̣ пин̣д̣а̄йа т̣хитам̣. дисва̄ бхагавантам̣ етадавоча – ‘‘ахам̣ кхо, саман̣а, каса̄ми ча вапа̄ми ча, каситва̄ ча вапитва̄ ча бхун̃джа̄ми. твампи, саман̣а, касассу ча вапассу ча, каситва̄ ча вапитва̄ ча бхун̃джассӯ’’ти. ‘‘ахампи кхо, бра̄хман̣а, каса̄ми ча вапа̄ми ча, каситва̄ ча вапитва̄ ча бхун̃джа̄мӣ’’ти. на кхо майам̣ пасса̄ма бхото готамасса йугам̣ ва̄ нан̇галам̣ ва̄ пха̄лам̣ ва̄ па̄чанам̣ ва̄ балӣбадде ва̄, атха ча пана бхавам̣ готамо евама̄ха – ‘‘ахампи кхо, бра̄хман̣а, каса̄ми ча вапа̄ми ча, каситва̄ ча вапитва̄ ча бхун̃джа̄мӣ’’ти. атха кхо касибха̄радва̄джо бра̄хман̣о бхагавантам̣ га̄тха̄йа аджджхабха̄си –

‘‘кассако пат̣иджа̄на̄си, на ча пасса̄ми те касим̣;

кассако пуччхито брӯхи, катхам̣ джа̄нему там̣ каси’’нти.

‘‘саддха̄ бӣджам̣ тапо вут̣т̣хи, пан̃н̃а̄ ме йуганан̇галам̣;

хирӣ ӣса̄ мано йоттам̣, сати ме пха̄лапа̄чанам̣.

‘‘ка̄йагутто вачӣгутто, а̄ха̄ре ударе йато;

саччам̣ кароми нидда̄нам̣, сораччам̣ ме памочанам̣.

‘‘вӣрийам̣ ме дхурадхорайхам̣, йогаккхема̄дхива̄ханам̣;

гаччхати аниваттантам̣, йаттха гантва̄ на сочати.

‘‘евамеса̄ касӣ кат̣т̣ха̄, са̄ хоти аматаппхала̄;

етам̣ касим̣ каситва̄на, саббадуккха̄ памуччатӣ’’ти.

‘‘бхун̃джату бхавам̣ готамо. кассако бхавам̣. йан̃хи бхавам̣ готамо аматаппхалампи касим̣ касатӣ’’ти [бха̄сатӣти (ка.)].

‘‘га̄тха̄бхигӣтам̣ ме абходжанеййам̣,

сампассатам̣ бра̄хман̣а неса дхаммо;

га̄тха̄бхигӣтам̣ пануданти буддха̄,

дхамме сати бра̄хман̣а вуттиреса̄.

‘‘ан̃н̃ена ча кевалинам̣ махесим̣,

кхӣн̣а̄савам̣ куккуччавӯпасантам̣;

аннена па̄нена упат̣т̣хахассу,

кхеттан̃хи там̣ пун̃н̃апеккхасса хотӣ’’ти.

евам̣ вутте, касибха̄радва̄джо бра̄хман̣о бхагавантам̣ етадавоча – ‘‘абхиккантам̣, бхо готама…пе… аджджатагге па̄н̣упетам̣ саран̣ам̣ гата’’нти.