333. паккагодхаджа̄такам̣ (4-4-3)

129. тадева ме твам̣ видито, ванамаджджхе ратхесабха;

йасса те кхаггабаддхасса, саннаддхасса тирӣт̣ино;

ассаттхадумаса̄кха̄йа, пакка̄ годха̄ пала̄йатха.

130. наме намантасса бхадже бхаджантам̣, кичча̄нукуббасса кареййа киччам̣;

на̄наттхака̄масса кареййа аттхам̣, асамбхаджантампи на самбхаджеййа.

131. чадже чаджантам̣ ванатхам̣ на кайира̄, апетачиттена на самбхаджеййа;

диджо думам̣ кхӣн̣апхаланти [пхалам̣ва (ка. сӣ. сйа̄. ка.), дуканипа̄те пут̣абхаттаджа̄такена сам̣сандетаббам̣] н̃атва̄, ан̃н̃ам̣ самеккхеййа маха̄ хи локо.

132. со те карисса̄ми йатха̄нубха̄вам̣, катан̃н̃утам̣ кхаттийе [кхаттийо (сйа̄. ка.)] пеккхама̄но;

саббан̃ча те иссарийам̣ дада̄ми, йассиччхасӣ тасса тувам̣ дада̄мӣти.

паккагодхаджа̄такам̣ [годхаджа̄такам̣ (сӣ. сйа̄. пӣ.)] татийам̣.