2. ун̣н̣а̄бхабра̄хман̣асуттаван̣н̣ана̄

512. дутийе гочарависайанти гочарабхӯтам̣ висайам̣. ан̃н̃аман̃н̃асса̄ти чаккху сотасса, сотам̣ ва̄ чаккхусса̄ти евам̣ екам̣ екасса гочарависайам̣ на паччанубхоти. саче хи нӣла̄дибхедам̣ рӯпа̄рамман̣ам̣ самодха̄нетва̄ сотиндрийасса упанеййа – ‘‘ин̇гха твам̣ та̄ва нам̣ ваваттхапехи вибха̄вехи ‘кинна̄метам̣ а̄рамман̣а’’’нти. чаккхувин̃н̃а̄н̣ам̣ вина̄пи мукхена аттано дхаммата̄йа евам̣ вадеййа – ‘‘аре, андхаба̄ла, вассасатампи вассасахассампи вассасатасахассампи паридха̄вама̄но ан̃н̃атра майа̄ кухим̣ етасса джа̄нанакам̣ лабхиссаси, там̣ а̄хара, чаккхупаса̄де упанехи, ахаметам̣ а̄рамман̣ам̣ джа̄нисса̄ми – йади ва̄ нӣлам̣, йади ва̄ пӣтакам̣. на хи есо ан̃н̃асса висайо, майхамевесо висайо’’ти. сесадва̄ресупи есева найо. евамета̄ни ан̃н̃аман̃н̃асса гочарависайам̣ на паччанубхонти на̄ма.

ким̣ пат̣исаран̣анти етесам̣ ким̣ пат̣исаран̣ам̣, ким̣ ета̄ни пат̣исарантӣти пуччхати. мано пат̣исаран̣анти джаванамано пат̣исаран̣ам̣. манова несанти манодва̄рикаджаванаманова етесам̣ гочарависайам̣ раджджана̄дивасена анубхоти. чаккхувин̃н̃а̄н̣ан̃хи рӯпадассанаматтамева, еттха раджджанам̣ ва̄ дуссанам̣ ва̄ муйханам̣ ва̄ наттхи. екасмим̣ пана два̄ре джаванам̣ раджджати ва̄ дуссати ва̄ муйхати ва̄. сотавин̃н̃а̄н̣а̄дӣсупи есева найо.

татра̄йам̣ упама̄ – пан̃ча кира дуббалабходжака̄ ра̄джа̄нам̣ севитва̄ киччхена касирена екасмим̣ пан̃чакулике га̄ме париттакам̣ а̄йам̣ лабхим̣су. тесам̣ таттха маччхабха̄го мам̣сабха̄го, аддукаха̄пан̣о ва̄ йоттакаха̄пан̣о ва̄ ма̄сакаха̄пан̣о ва̄ ат̣т̣хакаха̄пан̣о ва̄ сол̣асакаха̄пан̣о ва̄ чатусат̣т̣хикаха̄пан̣о ва̄ дан̣д̣оти еттакаматтамева па̄пун̣а̄ти, сатаваттхукам̣ пан̃часатаваттхукам̣ сахассаваттхукам̣ маха̄балим̣ ра̄джа̄ва ган̣ха̄ти.

таттха пан̃чакуликага̄ма̄ вийа пан̃чапаса̄да̄ дат̣т̣хабба̄, пан̃ча дуббалабходжака̄ вийа пан̃чавин̃н̃а̄н̣а̄ни; ра̄джа̄ вийа джаванам̣, дуббалабходжака̄нам̣ париттакаа̄йапа̄пун̣анам̣ вийа чаккхувин̃н̃а̄н̣а̄дӣнам̣ рӯпадассана̄диматтам̣, раджджана̄ди пана етесу наттхи. ран̃н̃о маха̄балиггахан̣ам̣ вийа тесу два̄ресу джаванасса раджджана̄дӣни ведитабба̄ни. еваметтха маноти кусала̄кусаладжаванам̣ вуттам̣.

сати пат̣исаран̣анти маггасати пат̣исаран̣ам̣. джаванамано хи маггасатим̣ пат̣исарати. вимуттӣти пхалавимутти. пат̣исаран̣анти пхалавимуттийа̄ нибба̄нам̣ пат̣исаран̣ам̣. тан̃хи са̄ пат̣исарати. на̄саккхи пан̃хасса парийантам̣ гахетунти пан̃хасса париччхедам̣ пама̄н̣ам̣ гахетум̣ на̄саккхи, аппат̣исаран̣ам̣ дхаммам̣ ‘‘саппат̣исаран̣а’’нти пуччхи. нибба̄нам̣ на̄метам̣ аппат̣исаран̣ам̣, на кин̃чи пат̣исарати. нибба̄ногадханти нибба̄наббхантарам̣ нибба̄нам̣ анупавит̣т̣хам̣. брахмачарийанти маггабрахмачарийам̣. нибба̄напара̄йан̣анти нибба̄нам̣ парам̣ айанамасса пара̄ гати, на тато парам̣ гаччхатӣти аттхо. нибба̄нам̣ парийоса̄нам̣ аваса̄нам̣ асса̄ти нибба̄напарийоса̄нам̣.

мӯладжа̄та̄ патит̣т̣хита̄ти маггена а̄гатасаддха̄ вуччати. имамхи че, бхиккхаве, самайети ким̣ сандха̄йа̄ха? джха̄наана̄га̄митам̣. тасмин̃хи самайе бра̄хман̣асса пат̣хамамаггена пан̃ча акусалачитта̄ни пахӣна̄ни, пат̣хамаджджха̄нена пан̃ча нӣваран̣а̄нӣти джха̄наана̄га̄мит̣т̣ха̄не т̣хито. со апарихӣнаджджха̄но ка̄лам̣ катва̄ таттхева паринибба̄йеййа. саче панасса путтада̄рам̣ ануса̄сантасса камманте вича̄рентасса джха̄нам̣ нассати, нат̣т̣хе джха̄не гати анибаддха̄ хоти, анат̣т̣хе пана нибаддха̄ти имам̣ джха̄наана̄га̄митам̣ сандха̄йа евама̄ха.