1. сӣвакасуттаван̣н̣ана̄

269. татийаваггасса пат̣хаме мол̣ийасӣвакоти сӣвакоти тасса на̄мам̣. чӯл̣а̄ панасса аттхи, тасма̄ мол̣ийасӣвакоти вуччати. парибба̄джакоти чханнапарибба̄джако. питтасамут̣т̣ха̄на̄нӣти питтапаччайа̄ни. ведайита̄нӣти ведана̄. таттха питтапаччайа̄ тиссо ведана̄ уппаджджанти. катхам̣? екаччо хи ‘‘питтам̣ ме купитам̣ дуджджа̄нам̣ кхо пана джӣвита’’нти да̄нам̣ дети, сӣлам̣ сама̄дийати упосатхакаммам̣ кароти, евамасса кусалаведана̄ уппаджджати. екаччо ‘‘питтабхесаджджам̣ карисса̄мӣ’’ти па̄н̣ам̣ ханати, адиннам̣ а̄дийати, муса̄ бхан̣ати, даса дуссӣлйакамма̄ни кароти, евамасса акусалаведана̄ уппаджджати. екаччо ‘‘еттакенапи ме бхесаджджакаран̣ена питтам̣ на вӯпасаммати, алам̣ йам̣ хоти. там̣ хотӯ’’ти маджджхатто ка̄йикаведанам̣ адхива̄сенто нипаджджати, евам̣ асса абйа̄катаведана̄ уппаджджати.

са̄мампи кхо етанти там̣ там̣ питтавика̄рам̣ дисва̄ аттана̄пи етам̣ ведитаббам̣. саччасамматанти бхӯтасамматам̣. локопи хисса сарӣре сабалаван̣н̣ата̄дипиттавика̄рам̣ дисва̄ ‘‘питтамасса купита’’нти джа̄на̄ти. тасма̄ти йасма̄ са̄ман̃ча видитам̣ локасса ча саччасамматам̣ атидха̄ванти, тасма̄. семхасамут̣т̣ха̄на̄дӣсупи есева найо. еттха пана саннипа̄тика̄нӣти тин̣н̣ампи питта̄дӣнам̣ копена самут̣т̣хита̄ни. утупарин̣а̄маджа̄нӣти висабха̄гаутуто джа̄та̄ни. джан̇галадесава̄сӣнан̃хи анупадесе васанта̄нам̣ висабха̄го уту уппаджджати, анупадесава̄сӣнан̃ча джан̇галадесети евам̣ малайасамуддатӣра̄дивасена̄пи утувисабха̄гата̄ уппаджджатийева. тато джа̄та̄ти утупарин̣а̄маджа̄та̄ни на̄ма.

висамапариха̄раджа̄нӣти маха̄бха̄раваханасудха̄кот̣т̣ана̄дито ва̄ авела̄йа чарантасса саппад̣ам̣сакӯпапа̄та̄дито ва̄ висамапариха̄рато джа̄та̄ни. опаккамика̄нӣти ‘‘айам̣ чоро ва̄ па̄рада̄рико ва̄’’ти гахетва̄ джан̣н̣укакаппарамуггара̄дӣхи ниппотханаупаккамам̣ паччайам̣ катва̄ уппанна̄ни. етам̣ бахи упаккамам̣ лабхитва̄ кочи вуттанайенева кусалам̣ кароти, кочи акусалам̣, кочи адхива̄сенто нипаджджати. каммавипа̄каджа̄нӣти кевалам̣ каммавипа̄като, джа̄та̄ни. тесупи хи уппаннесу вуттанайенева кочи кусалам̣ кароти, кочи акусалам̣, кочи адхива̄сенто нипаджджати. евам̣ саббава̄ресу тивидха̄ва ведана̄ хонти.

таттха пуримехи саттахи ка̄ран̣ехи уппанна̄ са̄рӣрика̄ ведана̄ сакка̄ пат̣иба̄хитум̣, каммавипа̄каджа̄нам̣ пана саббабхесаджджа̄нипи саббапаритта̄нипи на̄лам̣ пат̣игха̄та̄йа. имасмим̣ сутте локавоха̄ро на̄ма катхитоти.