5. суна̄гаттхерага̄тха̄ван̣н̣ана̄

читтанимиттасса ковидоти а̄йасмато суна̄гаттхерасса га̄тха̄. ка̄ уппатти? айампи пуримабуддхесу ката̄дхика̄ро таттха таттха бхаве виват̣т̣ӯпаниссайам̣ кусалам̣ упачинанто ито екаттим̣се каппе сикхисса бхагавато ка̄ле бра̄хман̣акуле ниббаттитва̄ вайаппатто тин̣н̣ам̣ веда̄нам̣ па̄рагӯ хутва̄ аран̃н̃а̄йатане ассаме васанто тӣн̣и бра̄хман̣асахасса̄ни манте ва̄чеси. атхекадивасам̣ тасса саттха̄рам̣ дисва̄ лаккхан̣а̄ни упадха̄ретва̄ лаккхан̣аманте париваттентасса, ‘‘ӣдисехи лаккхан̣ехи саманна̄гато анантаджино анантан̃а̄н̣о буддхо бхависсатӣ’’ти буддхан̃а̄н̣ам̣ а̄раббха ул̣а̄ро паса̄до уппаджджи. со тена читтаппаса̄дена девалоке ниббатто апара̄парам̣ девамануссесу сам̣саранто имасмим̣ буддхуппа̄де на̄лакага̄ме ан̃н̃атарасса бра̄хман̣асса путто хутва̄ ниббатти, суна̄готисса на̄мам̣ ахоси. со дхаммасена̄патисса гихисаха̄йо тхерасса сантикам̣ гантва̄ дхаммам̣ сутва̄ дассанабхӯмийам̣ патит̣т̣хито паббаджитва̄ випассанам̣ пат̣т̣хапетва̄ арахаттам̣ па̄пун̣и. тена вуттам̣ апада̄не (апа. тхера 1.14.34-40) –

‘‘химавантасса̄видӯре, васабхо на̄ма паббато;

тасмим̣ паббатапа̄дамхи, ассамо а̄си ма̄пито.

‘‘тӣн̣и сиссасахасса̄ни, ва̄чесим̣ бра̄хман̣о тада̄;

сам̣харитва̄на те сиссе, екамантам̣ упа̄висим̣.

‘‘екамантам̣ нисӣдитва̄, бра̄хман̣о мантапа̄рагӯ;

буддхаведам̣ гавесанто, н̃а̄н̣е читтам̣ паса̄дайим̣.

‘‘таттха читтам̣ паса̄детва̄, нисӣдим̣ пан̣н̣асантхаре;

паллан̇кам̣ а̄бхуджитва̄на, таттха ка̄лан̇като ахам̣.

‘‘екатим̣се ито каппе, йам̣ сан̃н̃амалабхим̣ тада̄;

дуггатим̣ на̄бхиджа̄на̄ми, н̃а̄н̣асан̃н̃а̄йидам̣ пхалам̣.

‘‘саттавӣсати каппамхи, ра̄джа̄ сиридхаро аху;

саттаратанасампанно, чаккаваттӣ махаббало.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

арахаттам̣ пана патва̄ бхиккхӯнам̣ дхаммадесана̄падесена ан̃н̃ам̣ бйа̄каронто –

85. ‘‘читтанимиттасса ковидо, павивекарасам̣ виджа̄нийа;

джха̄йам̣ нипако патиссато, адхигаччхеййа сукхам̣ нира̄миса’’нти. –

га̄тхам̣ абха̄си.

таттха читтанимиттасса ковидоти бха̄вана̄читтасса нимиттаггахан̣е кусало, ‘‘имасмим̣ самайе читтам̣ паггахетаббам̣, имасмим̣ сампахам̣ситаббам̣, имасмим̣ аджджхупеккхитабба’’нти евам̣ паггахан̣а̄дийогйасса читтанимиттасса гахан̣е чхеко. павивекарасам̣ виджа̄нийа̄ти ка̄йавивекасам̣вад̣д̣хитасса читтавивекасса расам̣ сан̃джа̄нитва̄, вивекасукхам̣ анубхавитва̄ти аттхо. ‘‘павивекарасам̣ питва̄’’ти (дха. па. 205) хи вуттам̣. джха̄йанти пат̣хамам̣ а̄рамман̣ӯпаниджджха̄нена паччха̄ лаккхан̣ӯпаниджджха̄нена ча джха̄йанто. нипакоти каммат̣т̣ха̄напарихаран̣е кусало. патиссатоти упат̣т̣хитассати. адхигаччхеййа сукхам̣ нира̄мисанти евам̣ саматханимитта̄дикосаллена лаббхе читтавивекасукхе патит̣т̣ха̄йа сато сампаджа̄но хутва̄ випассана̄джха̄ненева джха̄йанто ка̄ма̄мисават̣т̣а̄мисехи асаммиссата̄йа нира̄мисам̣ нибба̄насукхам̣ пхаласукхан̃ча адхигаччхеййа самупагаччхеййа̄ти аттхо.

суна̄гаттхерага̄тха̄ван̣н̣ана̄ нит̣т̣хита̄.