10. уггаттхерага̄тха̄ван̣н̣ана̄

йам̣ майа̄ пакатам̣ камманти а̄йасмато уггаттхерасса га̄тха̄. ка̄ уппатти? айампи пуримабуддхесу ката̄дхика̄ро таттха таттха бхаве пун̃н̃а̄ни каронто ито екатим̣се каппе сикхисса бхагавато ка̄ле кулагехе ниббаттитва̄ вин̃н̃утам̣ патто екадивасам̣ сикхим̣ бхагавантам̣ пасситва̄ пасаннама̄насо кетакапуппхехи пӯджам̣ ака̄си. со тена пун̃н̃акаммена девалоке ниббаттитва̄ апара̄парам̣ сугатӣсуйева сам̣саранто имасмим̣ буддхуппа̄де косаларат̣т̣хе угганигаме сет̣т̣хипутто хутва̄ ниббатти, угготвевасса на̄мам̣ ахоси. со вин̃н̃утам̣ патто бхагавати тасмим̣ нигаме бхадда̄ра̄ме вихаранте виха̄рам̣ гантва̄ саттху сантике дхаммам̣ сутва̄ пат̣иладдхасаддхо паббаджитва̄ випассана̄йа каммам̣ каронто начирассева арахаттам̣ па̄пун̣и. тена вуттам̣ апада̄не (апа. тхера 1.14.10-16) –

‘‘вината̄надийа̄ тӣре, пилаккху пхалито аху;

та̄хам̣ руккхам̣ гавесанто, аддасам̣ локана̄йакам̣.

‘‘кетакам̣ пуппхитам̣ дисва̄, ван̣т̣е чхетва̄нахам̣ тада̄;

буддхасса абхиропесим̣, сикхино локабандхуно.

‘‘йена н̃а̄н̣ена паттоси, аччутам̣ аматам̣ падам̣;

там̣ н̃а̄н̣ам̣ абхипӯджеми, буддхасет̣т̣ха маха̄муни.

‘‘н̃а̄н̣амхи пӯджам̣ катва̄на, пилаккхумаддасам̣ ахам̣;

пат̣иладдхомхи там̣ пан̃н̃ам̣, н̃а̄н̣апӯджа̄йидам̣ пхалам̣.

‘‘екатим̣се ито каппе, йам̣ пуппхамабхиропайим̣;

дуггатим̣ на̄бхиджа̄на̄ми, н̃а̄н̣апӯджа̄йидам̣ пхалам̣.

‘‘ито терасакаппамхи, два̄даса̄сум̣ пхалуггата̄;

саттаратанасампанна̄, чаккаваттӣ махаббала̄.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

арахаттам̣ пана патва̄ аттано ват̣т̣ӯпаччхедадӣпанена ан̃н̃ам̣ бйа̄каронто –

80. ‘‘йам̣ майа̄ пакатам̣ каммам̣, аппам̣ ва̄ йади ва̄ бахум̣;

саббаметам̣ париккхӣн̣ам̣, наттхи да̄ни пунаббхаво’’ти. – га̄тхам̣ абха̄си;

таттха йам̣ майа̄ пакатам̣ камманти йам̣ каммам̣ тӣхи каммадва̄рехи, чхахи уппаттидва̄рехи, ат̣т̣хахи асам̣варадва̄рехи, ат̣т̣хахи ча сам̣варадва̄рехи па̄па̄дивасена да̄на̄дивасена ча̄ти анекехи пака̄рехи ана̄димати сам̣са̄ре йам̣ майа̄ катам̣ упачитам̣ абхиниббаттитам̣ випа̄какаммам̣. аппам̣ ва̄ йади ва̄ бахунти тан̃ча ваттхучетана̄пайогакилеса̄дӣнам̣ дуббалабха̄вена аппам̣ ва̄, тесам̣ балавабха̄вена абхин̣хапаваттийа̄ ча бахум̣ ва̄. саббаметам̣ париккхӣн̣анти саббамева четам̣ каммам̣ каммаккхайакарасса аггамаггасса адхигататта̄ париккхайам̣ гатам̣, килесават̣т̣аппаха̄нена хи каммават̣т̣ам̣ пахӣнамева хоти випа̄кават̣т̣асса ануппа̄данато. тена̄ха ‘‘наттхи да̄ни пунаббхаво’’ти. а̄йатим̣ пунаббхава̄бхиниббатти майхам̣ наттхӣти аттхо. ‘‘саббампета’’нтипи па̄т̣хо, саббампи етанти падавибха̄го.

уггаттхерага̄тха̄ван̣н̣ана̄ нит̣т̣хита̄.

ат̣т̣хамаваггаван̣н̣ана̄ нит̣т̣хита̄.