9. косалавиха̄риттхерага̄тха̄ван̣н̣ана̄

саддха̄йа̄хам̣ паббаджитоти а̄йасмато косалавиха̄риттхерасса га̄тха̄. ка̄ уппатти? айампи кира падумуттарасса бхагавато ка̄ле кусалабӣджам̣ ропетва̄ там̣ там̣ пун̃н̃ам̣ ака̄си. сесам̣ ан̃джанаванийаттхераваттхусадисамева. айам̣ пана висесо – айам̣ кира вуттанайена паббаджитва̄ катапуббакиччо косаларат̣т̣хе ан̃н̃атарасмим̣ га̄ме екам̣ упа̄сакакулам̣ нисса̄йа аран̃н̃е вихарати, там̣ со упа̄сако руккхамӯле васантам̣ дисва̄ кут̣икам̣ ка̄ретва̄ ада̄си. тхеро кут̣ика̄йам̣ вихаранто а̄ва̄сасаппа̄йена сама̄дха̄нам̣ лабхитва̄ випассанам̣ уссукка̄петва̄ начирассева арахаттам̣ па̄пун̣и. тена вуттам̣ апада̄не (апа. тхера 1.11.53-61) –

‘‘химавантасса̄видӯре, васа̄ми пан̣н̣асантхаре;

гха̄сесу гедхама̄панно, сеййасӣло чахам̣ тада̄.

‘‘кхан̣анта̄лукаламба̄ни, бил̣а̄литаккала̄ни ча;

колам̣ бхалла̄такам̣ биллам̣, а̄хатва̄ пат̣ийа̄дитам̣.

‘‘падумуттаро локавидӯ, а̄хутӣнам̣ пат̣иггахо;

мама сан̇каппаман̃н̃а̄йа, а̄гаччхи мама сантикам̣.

‘‘упа̄гатам̣ маха̄на̄гам̣, девадевам̣ нара̄сабхам̣;

бил̣а̄лим̣ паггахетва̄на, паттамхи окирим̣ ахам̣.

‘‘парибхун̃джи маха̄вӣро, тосайанто мамам̣ тада̄;

парибхун̃джитва̄на саббан̃н̃ӯ, имам̣ га̄тхам̣ абха̄сатха.

‘‘сакам̣ читтам̣ паса̄детва̄, бил̣а̄лим̣ ме ада̄ тувам̣;

каппа̄нам̣ сатасахассам̣, дуггатим̣ нупападжджаси.

‘‘чаримам̣ ваттате майхам̣, бхава̄ саббе самӯхата̄;

дха̄реми антимам̣ дехам̣, самма̄самбуддхаса̄сане.

‘‘чатупан̃н̃а̄сито каппе, сумекхалийа савхайо;

саттаратанасампанно, чаккаваттӣ махаббало.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

арахаттам̣ пана патва̄ вимуттисукхаппат̣исам̣веданена уппаннапӣтивегена уда̄ненто ‘‘саддха̄йа̄хам̣ паббаджито’’ти га̄тхам̣ абха̄си.

59. таттха саддха̄йа̄ти бхагавато веса̄лим̣ упагамане а̄нубха̄вам̣ дисва̄, ‘‘екантаниййа̄никам̣ идам̣ са̄санам̣, тасма̄ аддха̄ има̄йа пат̣ипаттийа̄ джара̄маран̣ато муччисса̄мӣ’’ти уппаннасаддха̄васена паббаджито паббаджджам̣ упагато. аран̃н̃е ме кут̣ика̄ ката̄ти тасса̄ паббаджджа̄йа анурӯпавасена аран̃н̃е васато ме кут̣ика̄ ката̄, паббаджджа̄нурӯпам̣ а̄ран̃н̃ако хутва̄ вӯпакат̣т̣хо вихара̄мӣти дассети. тена̄ха ‘‘аппаматто ча а̄та̄пӣ, сампаджа̄но патиссато’’ти. аран̃н̃ава̄саладдхена ка̄йавивекена джа̄гарийам̣ ануйун̃джанто таттха сатийа̄ авиппава̄сена аппаматто, а̄раддхавӣрийата̄йа а̄та̄пӣ, пуббабха̄гийасатисампаджан̃н̃апа̄рипӯрийа̄ випассанам̣ вад̣д̣хетва̄ арахатта̄дхигамена пан̃н̃а̄сативепуллаппаттийа̄ аччантамева сампаджа̄но патиссато вихара̄мӣти аттхо. аппаматтабха̄ва̄дикиттане часса идамева ан̃н̃а̄бйа̄каран̣ам̣ ахоси косаларат̣т̣хе чиранива̄сибха̄вена пана косалавиха̄рӣти саман̃н̃а̄ джа̄та̄ти.

косалавиха̄риттхерага̄тха̄ван̣н̣ана̄ нит̣т̣хита̄.