9. ха̄ритаттхерага̄тха̄ван̣н̣ана̄

самуннамайаматта̄нанти а̄йасмато ха̄ритаттхерасса га̄тха̄. ка̄ уппатти? со кира пуримабуддхесу ката̄дхика̄ро хутва̄ таттха таттха виват̣т̣ӯпаниссайам̣ пун̃н̃асамбха̄рам̣ упачинанто ито екатим̣се каппе судассанам̣ на̄ма паччекасамбуддхам̣ дисва̄ пасаннама̄насо кут̣аджапуппхехи пӯджам̣ катва̄ тена пун̃н̃акаммена сугатӣсуйева париваттенто имасмим̣ буддхуппа̄де са̄ваттхинагаре бра̄хман̣амаха̄са̄лакуле ниббатти. ха̄ритотисса на̄мам̣ ахоси. тасса вайаппаттасса ма̄та̄питаро куларӯпа̄дӣхи ануччхавикам̣ кума̄рикам̣ бра̄хман̣адхӣтарам̣ а̄несум̣. со та̄йа саддхим̣ бхогасукхам̣ анубхаванто екадивасам̣ аттано тасса̄ ча рӯпасампаттим̣ олокетва̄ дхаммата̄йа чодийама̄но ‘‘ӣдисам̣ на̄ма рӯпам̣ начирассева джара̄йа маччуна̄ ча абхиппамаддӣйатӣ’’ти сам̣вегам̣ пат̣илабхи. катипайадиваса̄тиккаменева часса бхарийам̣ кан̣хасаппо д̣ам̣ситва̄ ма̄реси. со тена бхиййосоматта̄йа сан̃джа̄тасам̣вего саттху сантикам̣ гантва̄ дхаммам̣ сутва̄ гхарабандхане чхиндитва̄ паббаджи. тасса ча чарийа̄нукӯлам̣ каммат̣т̣ха̄нам̣ гахетва̄ вихарантасса каммат̣т̣ха̄нам̣ на сампаджджати, читтам̣ уджугатам̣ на хоти. со га̄мам̣ пин̣д̣а̄йа павит̣т̣хо ан̃н̃атарам̣ усука̄рам̣ усудан̣д̣ам̣ йанте паккхипитва̄ уджум̣ каронтам̣ дисва̄ ‘‘име ачетанампи на̄ма уджум̣ каронти, касма̄ ахам̣ читтам̣ уджум̣ на карисса̄мӣ’’ти чинтетва̄ татова пат̣иниваттитва̄ дива̄т̣т̣ха̄не нисинно випассанам̣ а̄рабхи. атхасса бхагава̄ упари а̄ка̄се нисӣдитва̄ ова̄дам̣ денто ‘‘самуннамайаматта̄на’’нти га̄тхам̣ абха̄си. айамева тхеро атта̄нам̣ парам̣ вийа оваданто абха̄сӣти ча ваданти.

29. таттха самуннамайанти самма̄ уннаменто, сама̄паттивасена косаджджапаккхе патитум̣ адатва̄ тато уддхаранто вӣрийасаматам̣ йоджентоти аттхо. атта̄нанти читтам̣, атха ва̄ самуннамайа̄ти косаджджапаккхато самуннамехи. ма-ка̄ро падасандхикаро. хӣнавӣрийата̄йа тава читтам̣ каммат̣т̣ха̄навӣтхим̣ наппат̣ипаджджати че, там̣ вӣрийа̄рамбхавасена самма̄ уннамехи, анонатам̣ анапанатам̣ карохӣти адхиппа̄йо. евам̣ пана каронто усука̄рова теджанам̣. читтам̣ уджум̣ каритва̄на, авиджджам̣ бхинда ха̄рита̄ти. йатха̄ на̄ма усука̄ро кан̣д̣ам̣ ӣсакампи онатам̣ апанатан̃ча виджджханто лаккхам̣ бхинданаттхам̣ уджум̣ кароти, евам̣ косаджджапа̄тато араккхан̣ена онатам̣ уддхаччапа̄тато араккхан̣ена апанатам̣ виджджханто аппана̄паттийа̄ читтам̣ уджум̣ каритва̄на сама̄хитачитто випассанам̣ уссукка̄петва̄ сӣгхам̣ аггамагган̃а̄н̣ена авиджджам̣ бхинда пада̄лехӣти. там̣ сутва̄ тхеро випассанам̣ вад̣д̣хетва̄ начиренева араха̄ ахоси. тена вуттам̣ апада̄не (апа. тхера 1.35.39-43) –

‘‘химавантасса̄видӯре, васало на̄ма паббато;

буддхо судассано на̄ма, васате паббатантаре.

‘‘пуппхам̣ хемавантам̣ гайха, веха̄сам̣ агама̄сахам̣;

таттхаддаса̄сим̣ самбуддхам̣, огхатин̣н̣амана̄савам̣.

‘‘пуппхам̣ кут̣аджама̄да̄йа, сӣсе катва̄нахам̣ тада̄;

буддхасса абхиропесим̣, сайамбхусса махесино.

‘‘екатим̣се ито каппе, йам̣ пуппхамабхипӯджайим̣;

дуггатим̣ на̄бхиджа̄на̄ми, пуппхапӯджа̄йидам̣ пхалам̣.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

арахаттам̣ пана патва̄ ан̃н̃ам̣ бйа̄каронтопи тамева га̄тхам̣ абха̄си.

ха̄ритаттхерага̄тха̄ван̣н̣ана̄ нит̣т̣хита̄.