7. ломасакан̇гийаттхерага̄тха̄ван̣н̣ана̄

даббам̣ кусанти а̄йасмато ломасакан̇гийаттхерасса га̄тха̄. ка̄ уппатти? со кира ито еканавуте каппе випассим̣ бхагавантам̣ пасситва̄ пасаннама̄насо на̄на̄пуппхехи пӯджетва̄ тена пун̃н̃акаммена девалоке ниббатто пуна апара̄парам̣ пун̃н̃а̄ни катва̄ сугатӣсуйева сам̣саранто кассапасса бхагавато са̄сане паббаджитва̄ саман̣адхаммам̣ кароти. тена ча самайена саттха̄ра̄ бхаддекараттапат̣ипада̄йа катхита̄йа ан̃н̃атаро бхиккху бхаддекараттасуттавасена тена са̄каччхам̣ кароти. со там̣ на сампа̄йа̄си. асампа̄йанто ‘‘ахам̣ ана̄гате туйхам̣ бхаддекараттам̣ катхетум̣ саматтхо бхавеййа’’нти пан̣идха̄нам̣ ака̄си, итаро ‘‘пуччхеййа’’нти. етесу пат̣хамо екам̣ буддхантарам̣ девамануссесу сам̣саритва̄ амха̄кам̣ бхагавато ка̄ле капилаваттхусмим̣ са̄кийара̄джакуле ниббатти. тасса сукхума̄лабха̄вена сон̣асса вийа па̄даталесу лома̄ни джа̄та̄ни, тенасса ломасакан̇гийоти на̄мам̣ ахоси. итаро девалоке ниббаттитва̄ чанданоти пан̃н̃а̄йиттха. ломасакан̇гийо ануруддха̄дӣсу сакйакума̄ресу паббаджантесу паббаджитум̣ на иччхи. атха нам̣ сам̣веджетум̣ чандано девапутто упасан̇камитва̄ бхаддекараттам̣ пуччхи. итаро ‘‘на джа̄на̄мӣ’’ти. пуна девапутто ‘‘атха касма̄ тайа̄ ‘бхаддекараттам̣ катхеййа’нти сан̇гаро като, ида̄ни пана на̄маматтампи на джа̄на̄сӣ’’ти чодеси. итаро тена саддхим̣ бхагавантам̣ упасан̇камитва̄, ‘‘майа̄ кира, бханте, пуббе ‘имасса бхаддекараттам̣ катхесса̄мӣ’ти сан̇гаро като’’ти пуччхи. бхагава̄ ‘‘а̄ма, кулапутта, кассапасса бхагавато ка̄ле тайа̄ евам̣ ката’’нти а̄ха. сва̄йаматтхо упарипан̣н̣а̄саке а̄гатанайена виттха̄рато ведитаббо. атха ломасакан̇гийо ‘‘тена хи, бханте, пабба̄джетха ма’’нти а̄ха. бхагава̄ ‘‘на, кхо, татха̄гата̄ ма̄та̄питӯхи ананун̃н̃а̄там̣ путтам̣ пабба̄джентӣ’’ти пат̣иккхипи. со ма̄ту сантикам̣ гантва̄ ‘‘ануджа̄на̄хи мам̣, амма, паббаджитум̣, паббаджисса̄маха’’нти ватва̄, ма̄тара̄ ‘‘та̄та, сукхума̄ло твам̣ катхам̣ паббаджиссасӣ’’ти вутте, ‘‘аттано париссайасаханабха̄вам̣ пака̄сенто ‘‘даббам̣ кусам̣ пот̣акила’’нти га̄тхам̣ абха̄си.

27. таттха даббанти даббатин̣ама̄ха, йам̣ ‘‘саддуло’’типи вуччати. кусанти кусатин̣ам̣, йо ‘‘ка̄со’’ти вуччати. пот̣акиланти сакан̣т̣акам̣ акан̣т̣акан̃ча гаччхам̣. идха пана сакан̣т̣акамева адхиппетам̣. усӣра̄дӣни сувин̃н̃еййа̄ни. дабба̄дӣни тин̣а̄ни бӣран̣атин̣а̄ни па̄дехи аккантасса̄пи дуккхаджанака̄ни гаманантара̄йакара̄ни ча, та̄ни ча пана̄хам̣ ураса̄ панудисса̄ми ураса̄пи апанесса̄ми. евам̣ апаненто там̣ нимиттам̣ дуккхам̣ саханто аран̃н̃а̄йатане гумбантарам̣ пависитва̄ саман̣адхаммам̣ ка̄тум̣ саккхисса̄ми. ко пана ва̄до па̄дехи аккаманети дассети. вивекаманубрӯхайанти ка̄йавивекам̣ читтавивекам̣ упадхививекан̃ча анубрӯхайанто. ган̣асан̇ган̣икан̃хи паха̄йа ка̄йавивекам̣ анубрӯхайантассева ат̣т̣хатим̣са̄йа а̄рамман̣есу йаттха каттхачи читтам̣ сама̄дахантасса читтавивеко, на сан̇ган̣ика̄ратасса. сама̄хитассева випассана̄йа каммам̣ каронтасса саматхавипассанан̃ча йуганаддхам̣ каронтасса килеса̄нам̣ кхепанена упадхививека̄дхигамо, на асама̄хитасса. тена вуттам̣ ‘‘вивекаманубрӯхайанти ка̄йавивекам̣ читтавивекам̣ упадхививекан̃ча анубрӯхайанто’’ти. евам̣ пана путтена вутте ма̄та̄ ‘‘тена хи, та̄та, паббаджа̄’’ти ануджа̄ни. со бхагавантам̣ упасан̇камитва̄ паббаджджам̣ йа̄чи. там̣ саттха̄ пабба̄джеси. там̣ паббаджитва̄ катапуббакиччам̣ каммат̣т̣ха̄нам̣ гахетва̄ аран̃н̃ам̣ пависантам̣ бхиккхӯ а̄хам̣су – ‘‘а̄вусо, твам̣ сукхума̄ло ким̣ саккхиссаси аран̃н̃е васиту’’нти. со тесампи тамева га̄тхам̣ ватва̄ аран̃н̃ам̣ пависитва̄ бха̄ванам̣ ануйун̃джанто начирассева чхал̣абхин̃н̃о ахоси. тена вуттам̣ апада̄не (апа. тхера 2.52.23-27) –

‘‘суван̣н̣аван̣н̣ам̣ самбуддхам̣, а̄хутӣнам̣ пат̣иггахам̣;

ратхийам̣ пат̣ипаджджантам̣, на̄на̄пуппхехи пӯджайим̣.

‘‘еканавутито каппе, йам̣ пуппхамабхипӯджайим̣;

дуггатим̣ на̄бхиджа̄на̄ми, буддхапӯджа̄йидам̣ пхалам̣.

‘‘килеса̄ джха̄пита̄ майхам̣…пе… катам̣ буддхасса са̄сана’’нти.

арахаттам̣ пана патва̄ тхеро ан̃н̃ам̣ бйа̄каронто там̣йева га̄тхам̣ абха̄сӣти.

ломасакан̇гийаттхерага̄тха̄ван̣н̣ана̄ нит̣т̣хита̄.