10. аджитаттхерага̄тха̄ван̣н̣ана̄
маран̣е ме бхайам̣ наттхӣти а̄йасмато аджитаттхерасса га̄тха̄. ка̄ уппатти? со кира еканавуте каппе випассим̣ бхагавантам̣ пасситва̄ пасанначитто капиттхапхалам̣ ада̄си. тато парампи там̣ там̣ пун̃н̃ам̣ катва̄ девамануссесу сам̣саранто имасмим̣ каппе ануппанне ева амха̄кам̣ саттхари са̄ваттхийам̣ маха̄косаларан̃н̃о агга̄санийасса бра̄хман̣асса путто хутва̄ ниббатти. тасса аджитоти на̄мам̣ ахоси. тасмин̃ча самайе са̄ваттхива̄сӣ ба̄варӣ на̄ма бра̄хман̣о тӣхи маха̄пурисалаккхан̣ехи саманна̄гато тин̣н̣ам̣ веда̄нам̣ па̄рагӯ са̄ваттхито никкхамитва̄ та̄пасапаббаджджам̣ паббаджитва̄ годха̄варӣтӣре капиттха̄ра̄ме васати. атха аджито тасса сантике паббаджито аттхака̄ма̄йа девата̄йа чодитена ба̄варина̄ саттху сантикам̣ песито тиссаметтеййа̄дӣхи саддхим̣ бхагавантам̣ упасан̇камитва̄ манаса̄ва пан̃хе пуччхитва̄ тесу виссаджджитесу пасанначитто саттху сантике паббаджитва̄ каммат̣т̣ха̄нам̣ гахетва̄ випассанам̣ вад̣д̣хетва̄ арахаттам̣ па̄пун̣и. тена вуттам̣ апада̄не (апа. тхера 2.52.7-11) –
‘‘суван̣н̣аван̣н̣ам̣ самбуддхам̣, а̄хутӣнам̣ пат̣иггахам̣;
ратхийам̣ пат̣ипаджджантам̣, капиттхам̣ ададим̣ пхалам̣.
‘‘еканавутито каппе, йам̣ пхалам̣ ададим̣ дада̄;
дуггатим̣ на̄бхиджа̄на̄ми, пхалада̄нассидам̣ пхалам̣.
‘‘килеса̄ джха̄пита̄ майхам̣…пе… катам̣ буддхасса са̄сана’’нти.
арахаттам̣ пана патто сӣхана̄дам̣ наданто ‘‘маран̣е ме бхайам̣ наттхӣ’’ти га̄тхам̣ абха̄си.
20. таттха маран̣ети маран̣анимиттам̣ маран̣ахету. мети майхам̣, бхайам̣ наттхи уччхиннабхавамӯлата̄йа париккхӣн̣аджа̄тикатта̄. ануччхиннабхавамӯла̄нан̃хи ‘‘кӣдисӣ ну кхо майхам̣ а̄йатим̣ уппаттӣ’’ти маран̣ато бхайам̣ бхавеййа. никантӣти апеккха̄ тан̣ха̄, са̄ наттхи джӣвите супаримаддитасан̇кха̄рата̄йа упа̄да̄наккхандха̄нам̣ дуккха̄са̄рака̄дибха̄вена сут̣т̣ху упат̣т̣хаханато. евам̣бхӯто ча̄хам̣ сандехам̣ сарӣрам̣, сакам̣ ва̄ дехам̣ дехасан̇кха̄там̣ дуккхабха̄рам̣ никкхиписса̄ми чхад̣д̣есса̄ми, никкхипанто ча ‘‘‘имина̄ сарӣракена са̄дхетаббам̣ са̄дхитам̣, ида̄ни там̣ екам̣сена чхад̣д̣анӣйамева̄’ти пан̃н̃а̄вепуллаппаттийа̄ сампаджа̄но сативепуллаппаттийа̄ пат̣иссато никкхиписса̄мӣ’’ти. имам̣ пана га̄тхам̣ ватва̄ тхеро джха̄нам̣ сама̄паджджитва̄ таданантарам̣ паринибба̄йӣти.
аджитаттхерага̄тха̄ван̣н̣ана̄ нит̣т̣хита̄.
дутийаваггаван̣н̣ана̄ нит̣т̣хита̄.