10. париха̄насуттаван̣н̣ана̄

79. дасаме париха̄на̄йа сам̣ваттантӣти авуддхийа̄ бхаванти, магга̄дхигамасса парипантха̄йа хонти. адхигатасса пана маггасса париха̄ни на̄ма наттхи. ‘‘тайо дхамма̄’’ти дхамма̄дхит̣т̣ха̄навасена уддит̣т̣хадхамме пуггала̄дхит̣т̣ха̄на̄йа десана̄йа вибхаджанто ‘‘идха, бхиккхаве, секхо бхиккхӯ’’тиа̄дима̄ха.

таттха каммам̣ а̄рамитаббато а̄ра̄мо етасса̄ти камма̄ра̄мо. камме ратоти каммарато. камма̄ра̄матам̣ камма̄бхиратим̣ ануйутто пайуттоти камма̄ра̄матамануйутто. таттха каммам̣ на̄ма итикаттаббам̣ каммам̣, сеййатхидам̣ – чӣваравича̄ран̣ам̣, чӣваракаран̣ам̣, упаттхамбханам̣, паттаттхавикам̣, ам̣сабандханам̣, ка̄йабандханам̣, дхамакаран̣ам̣, а̄дха̄ракам̣, па̄дакатхаликам̣, саммаджджанӣти евама̄дӣнам̣ упакаран̣а̄нам̣ каран̣ам̣, йан̃ча виха̄ре кхан̣д̣апхулла̄дипат̣исан̇кхаран̣ам̣. екаччо хи ета̄ни каронто сакаладивасам̣ ета̄нева кароти. там̣ сандха̄йетам̣ вуттам̣. йо пана етесам̣ каран̣авела̄йамева ета̄ни кароти, уддесавела̄йам̣ уддесам̣ ган̣ха̄ти, саджджха̄йавела̄йам̣ саджджха̄йати, четийан̇ган̣аватта̄дикаран̣авела̄йам̣ четийан̇ган̣аватта̄дӣни кароти, манасика̄равела̄йам̣ манасика̄рам̣ кароти саббаттхакакаммат̣т̣ха̄не ва̄ па̄риха̄рийакаммат̣т̣ха̄не ва̄, на со камма̄ра̄мо на̄ма. тасса там̣ –

‘‘йа̄ни кхо пана та̄ни сабрахмача̄рӣнам̣ учча̄вача̄ни ким̣каран̣ӣйа̄ни, таттха даккхо хоти аналасо, татрупа̄йа̄йа вӣмам̣са̄йа саманна̄гато, алам̣ ка̄тум̣ алам̣ сам̣видха̄ту’’нти (дӣ. ни. 3.345; а. ни. 10.18) –

а̄дина̄ саттха̄ра̄ анун̃н̃а̄такаран̣амева хоти.

бхасса̄ра̄моти йо бхагавата̄ пат̣иккхиттара̄джакатха̄дивасена раттиндивам̣ вӣтина̄мети, айам̣ бхассе парийантака̄рӣ на хотӣти бхасса̄ра̄мо на̄ма. йо пана раттимпи дива̄пи дхаммам̣ катхети, пан̃хам̣ виссаджджети, айам̣ аппабхассо бхассе парийантака̄рӣйева. касма̄? ‘‘саннипатита̄нам̣ во, бхиккхаве, двайам̣ каран̣ӣйам̣ – дхаммӣ ва̄ катха̄, арийо ва̄ тун̣хӣбха̄во’’ти (ма. ни. 1.273) вуттавидхим̣йева пат̣ипанноти.

нидда̄ра̄моти йо йа̄вадаттхам̣ удара̄вадехакам̣ бхун̃джитва̄ сеййасукхам̣, пассасукхам̣, миддхасукхам̣ ануйун̃джати, йо ча гаччхантопи нисиннопи т̣хитопи тхинамиддха̄бхибхӯто нидда̄йати, айам̣ нидда̄ра̄мо на̄ма. йасса пана караджака̄йагелан̃н̃ена читтам̣ бхаван̇гам̣ отарати, на̄йам̣ нидда̄ра̄мо, тенева̄ха –

‘‘абхиджа̄на̄ми кхо пана̄хам̣, аггивессана, гимха̄нам̣ паччхиме ма̄се паччха̄бхаттам̣ пин̣д̣апа̄таппат̣икканто чатуггун̣ам̣ сан̇гха̄т̣им̣ пан̃н̃а̄петва̄ даккхин̣ена пассена сато сампаджа̄но ниддам̣ оккамита̄’’ти (ма. ни. 1.387).

еттха ча путхуджджанакалйа̄н̣акопи секхотвева ведитаббо. тасма̄ тасса саббассапи висеса̄дхигамасса итаресам̣ упари висеса̄дхигамасса ча париха̄на̄йа ваттантӣти ведитаббам̣. суккапаккхасса вуттавипарийа̄йена аттхавибха̄вана̄ ведитабба̄.

га̄тха̄су уддхатоти читтавиккхепакарена уддхаччена уддхато авӯпасанто. аппакиччасса̄ти анун̃н̃а̄тассапи вуттаппака̄расса киччасса йуттаппайуттака̄лейева каран̣ато аппакиччо асса бхавеййа. аппамиддхоти ‘‘дивасам̣ чан̇камена нисаджджа̄йа̄’’тиа̄дина̄ вуттаджа̄гарийа̄нуйогена нидда̄рахито асса. ануддхатоти бхасса̄ра̄мата̄йа уппаджджанакачиттавиккхепасса абхасса̄ра̄мо хутва̄ париваджджанена на уддхато вӯпасантачитто, сама̄хитоти аттхо. сесам̣ пуббе вуттанайатта̄ сувин̃н̃еййамева. ити имасмим̣ вагге пат̣хамадутийапан̃чамачхат̣т̣хасаттамаат̣т̣хаманавамесу суттесу ват̣т̣ам̣ катхитам̣, итаресу ват̣т̣авиват̣т̣ам̣.

дасамасуттаван̣н̣ана̄ нит̣т̣хита̄.

татийаваггаван̣н̣ана̄ нит̣т̣хита̄.