10. дутийара̄гасуттаван̣н̣ана̄

69. дасаме атарӣти тин̣н̣о, на тин̣н̣о атин̣н̣о. самудданти сам̣са̄расамуддам̣, чаккха̄йатана̄дисамуддам̣ ва̄. тадубхайампи дуппӯран̣ат̣т̣хена самуддо вийа̄ти самуддам̣. атха ва̄ самудданат̣т̣хена самуддам̣, килесавассанена саттасанта̄насса килесасаданатоти аттхо. савӣчинти кодхӯпа̄йа̄савӣчӣхи савӣчим̣. вуттан̃хетам̣ ‘‘вӣчибхайанти кхо, бхиккху, кодхӯпа̄йа̄сассетам̣ адхивачана’’нти (итиву. 109; ма. ни. 2.162). са̄ват̣т̣анти пан̃чака̄магун̣а̄ват̣т̣ехи саха а̄ват̣т̣ам̣. вуттампи четам̣ ‘‘а̄ват̣т̣абхайанти кхо, бхиккху, пан̃чаннетам̣ ка̄магун̣а̄нам̣ адхивачана’’нти (итиву. 109; ма. ни. 2.164; а. ни. 4.122). сагахам̣ сараккхасанти аттано гочарагата̄нам̣ анаттхаджананато чан̣д̣амакарамаччхакаччхапараккхасасадисехи висабха̄гапуггалехи сахитам̣. татха̄ ча̄ха ‘‘сагахам̣ сараккхасанти кхо, бхиккху, ма̄туга̄массетам̣ адхивачана’’нти (итиву. 109). атарӣти маггапан̃н̃а̄на̄ва̄йа йатха̄вуттам̣ самуддам̣ уттари. тин̣н̣оти ниттин̣н̣о. па̄ран̇гатоти тасса самуддасса па̄рам̣ паратӣрам̣ ниродхам̣ упагато. тхале тит̣т̣хатӣти тато ева сам̣са̄рамахогхам̣ ка̄ма̄димахогхан̃ча атиккамитва̄ тхале паратӣре нибба̄не ба̄хитапа̄пабра̄хман̣о тит̣т̣хатӣти вуччати.

идха̄пи га̄тха̄ суккапаккхавасенева а̄гата̄. таттха ӯмибхайанти йатха̄вуттаӯмибхайам̣, бха̄йитаббам̣ етасма̄ти там̣ ӯми бхайам̣. дуттаранти дуратиккамам̣. аччата̄рӣти атикками.

сан̇га̄тиготи ра̄га̄дӣнам̣ пан̃чаннам̣ сан̇га̄нам̣ атиккантатта̄ пахӣнатта̄ сан̇га̄тиго. аттхан̇гато со на пама̄н̣аметӣти со евам̣бхӯто араха̄ ра̄га̄дӣнам̣ пама̄н̣акарадхамма̄нам̣ аччантамева аттхам̣ гататта̄ аттхан̇гато, тато ева сӣла̄дидхаммаккхандхапа̄рипӯрийа̄ ча ‘‘едисо сӣлена сама̄дхина̄ пан̃н̃а̄йа̄’’ти кеначи памин̣итум̣ асаккун̣еййо пама̄н̣ам̣ на ети, атха ва̄ анупа̄дисесанибба̄насан̇кха̄там̣ аттхам̣ гато со араха̄ ‘‘има̄йа на̄ма гатийа̄ т̣хито, едисо ча на̄маготтена̄’’ти памин̣итум̣ асаккун̣еййата̄йа пама̄н̣ам̣ на ети на упагаччхати. тато ева амохайи маччура̄джам̣, тена анубандхитум̣ асаккун̣еййоти вада̄мӣти анупа̄дисесанибба̄надха̄туйа̄ва десанам̣ нит̣т̣ха̄песи. ити имасмим̣ вагге пат̣хамапан̃чамачхат̣т̣хесу ват̣т̣ам̣ катхитам̣, дутийасаттамаат̣т̣хамесу виват̣т̣ам̣, сесесу ват̣т̣авиват̣т̣ам̣ катхитанти ведитаббам̣.

дасамасуттаван̣н̣ана̄ нит̣т̣хита̄.

дутийаваггаван̣н̣ана̄ нит̣т̣хита̄.