1. пун̃н̃акирийаваттхусуттаван̣н̣ана̄

60. дутийаваггасса пат̣хаме пун̃н̃акирийаваттхӯнӣти пуджджабхавапхалам̣ ниббаттенти, аттано санта̄нам̣ пунантӣти ва̄ пун̃н̃а̄ни, пун̃н̃а̄ни ча та̄ни хетупаччайехи каттаббато кирийа̄ ча̄ти пун̃н̃акирийа̄. та̄ ева ча тесам̣ тесам̣ а̄нисам̣са̄нам̣ ваттхубха̄вато пун̃н̃акирийаваттхӯни. да̄намайанти анупаччхиннабхавамӯласса ануггахавасена пӯджа̄васена ва̄ аттано деййадхаммасса паресам̣ паричча̄гачетана̄ дӣйати ета̄йа̄ти да̄нам̣, да̄намева да̄намайам̣. чӣвара̄дӣсу хи чатӯсу паччайесу анна̄дӣсу ва̄ дасасу да̄наваттхӯсу рӯпа̄дӣсу ва̄ чхасу а̄рамман̣есу там̣ там̣ дентасса тесам̣ уппа̄данато пат̣т̣ха̄йа пуббабха̄ге паричча̄гака̄ле паччха̄ соманассачиттена ануссаран̣е ча̄ти тӣсу ка̄лесу вуттанайена паваттачетана̄ да̄намайам̣ пун̃н̃акирийаваттху на̄ма.

сӣламайанти ниччасӣлаупосатханийама̄дивасена пан̃ча, ат̣т̣ха, даса ва̄ сӣла̄ни сама̄дийантасса сӣлапӯран̣аттхам̣ паббаджисса̄мӣти виха̄рам̣ гаччхантасса паббаджантасса маноратхам̣ маттхакам̣ па̄петва̄ ‘‘паббаджито ватамхи са̄дху сут̣т̣хӯ’’ти а̄ваджджентасса саддха̄йа па̄тимоккхам̣ парипӯрентасса пан̃н̃а̄йа чӣвара̄дике паччавеккхантасса сатийа̄ а̄па̄тхагатесу рӯпа̄дӣсу чаккхудва̄ра̄дӣни сам̣варантасса вӣрийена а̄джӣвам̣ содхентасса ча паватта̄ четана̄ сӣлатӣти сӣламайам̣ пун̃н̃акирийаваттху на̄ма.

татха̄ пат̣исамбхида̄йам̣ (пат̣и. ма. 1.48) вуттена випассана̄маггена чаккхум̣ аниччато дуккхато анаттато випассантасса сотам̣, гха̄нам̣, дживхам̣, ка̄йам̣, манам̣. рӯпе…пе… дхамме, чаккхувин̃н̃а̄н̣ам̣…пе… мановин̃н̃а̄н̣ам̣. чаккхусампхассам̣…пе… маносампхассам̣, чаккхусампхассаджам̣ веданам̣…пе… маносампхассаджам̣ веданам̣. рӯпасан̃н̃ам̣…пе… дхаммасан̃н̃ам̣. джара̄маран̣ам̣ аниччато дуккхато анаттато випассантасса йа̄ четана̄, йа̄ ча патхавӣкасин̣а̄дӣсу ат̣т̣хатим̣са̄йа а̄рамман̣есу паватта̄ джха̄начетана̄, йа̄ ча анаваджджесу камма̄йатанасиппа̄йатанавиджджа̄т̣т̣ха̄несу паричайаманасика̄ра̄дивасена паватта̄ четана̄, сабба̄ бха̄вети ета̄йа̄ти бха̄вана̄майам̣ вуттанайена пун̃н̃акирийаваттху ча̄ти.

екамекан̃четтха йатха̄рахам̣ пуббабха̄гато пат̣т̣ха̄йа ка̄йена каронтасса ка̄йакаммам̣ хоти, тадаттхам̣ ва̄чам̣ ниччха̄рентасса вачӣкаммам̣, ка̄йан̇гам̣ ва̄чан̇ган̃ча ачопетва̄ манаса̄ чинтентасса манокаммам̣. анна̄дӣни дентасса ча̄пи ‘‘аннада̄на̄дӣни демӣ’’ти ва̄ да̄напа̄рамим̣ а̄ваджджетва̄ ва̄ да̄нака̄ле да̄намайам̣ пун̃н̃акирийаваттху хоти. ваттасӣсе т̣хатва̄ дадато сӣламайам̣, кхайато вайато каммато саммасанам̣ пат̣т̣хапетва̄ дадато бха̄вана̄майам̣ пун̃н̃акирийаваттху хоти.

апара̄нипи сатта пун̃н̃акирийаваттхӯни – апачитисахагатам̣ пун̃н̃акирийаваттху веййа̄ваччасахагатам̣ паттиануппада̄нам̣ аббханумоданам̣ десана̄майам̣ саванамайам̣ дит̣т̣хиджугатам̣ пун̃н̃акирийаваттхӯти. саран̣агаманампи хи дит̣т̣хиджугатенева сан̇гайхати. йам̣ панеттха ваттаббам̣, там̣ парато а̄ви бхависсати.

таттха вуд̣д̣хатарам̣ дисва̄ паччуггаманапаттачӣварапат̣иггахан̣а̄бхива̄данамаггасампада̄на̄дивасена апача̄йанасахагатам̣ ведитаббам̣. вуд̣д̣хатара̄нам̣ ваттапат̣ипаттикаран̣авасена, га̄мам̣ пин̣д̣а̄йа павит̣т̣хам̣ бхиккхум̣ дисва̄ паттам̣ гахетва̄ га̄ме бхиккхам̣ сампа̄детва̄ упасам̣харан̣авасена ‘‘гаччха бхиккхӯнам̣ паттам̣ а̄хара̄’’ти сутва̄ вегена гантва̄ патта̄харан̣а̄дивасена ча веййа̄ваччасахагатам̣ ведитаббам̣. чатта̄ро паччайе датва̄ пуппхагандха̄дӣхи ратанаттайасса пӯджам̣ катва̄ ан̃н̃ам̣ ва̄ та̄дисам̣ пун̃н̃ам̣ катва̄ ‘‘саббасатта̄нам̣ патти хотӯ’’ти парин̣а̄мавасена паттиануппада̄нам̣ ведитаббам̣. татха̄ парехи динна̄йа паттийа̄ кевалам̣ ва̄ парехи катам̣ пун̃н̃ам̣ ‘‘са̄дху, сут̣т̣хӯ’’ти анумоданавасена аббханумоданам̣ ведитаббам̣. аттано пагун̣адхаммам̣ апачча̄сӣсанто хитаджджха̄сайена паресам̣ десети – идам̣ десана̄майам̣ пун̃н̃акирийаваттху на̄ма. йам̣ пана еко ‘‘евам̣ мам̣ дхаммакатхикоти джа̄ниссантӣ’’ти иччха̄йа т̣хатва̄ ла̄бхасакка̄расилокасанниссито дхаммам̣ десети, там̣ на махаппхалам̣ хоти. ‘‘аддха̄ айам̣ аттахитапарахита̄нам̣ пат̣ипаджджанӯпа̄йо’’ти йонисоманасика̄рапуреча̄рикахитапхаран̣ена мудучиттена дхаммам̣ сун̣а̄ти, идам̣ саванамайам̣ пун̃н̃акирийаваттху хоти. йам̣ панеко ‘‘ити мам̣ саддхоти джа̄ниссантӣ’’ти сун̣а̄ти, там̣ на махаппхалам̣ хоти. дит̣т̣хийа̄ уджугаманам̣ дит̣т̣хиджугатам̣, ‘‘аттхи динна’’нтиа̄динайаппаваттасса самма̄дассанасса етам̣ адхивачанам̣. идан̃хи пуббабха̄ге ва̄ паччха̄бха̄ге ва̄ н̃а̄н̣авиппайуттампи уджукаран̣ака̄ле н̃а̄н̣асампайуттамева хоти. апаре пана̄ху ‘‘виджа̄нанападжа̄нанавасена дассанам̣ дит̣т̣хи кусалан̃ча вин̃н̃а̄н̣ам̣ каммассаката̄н̃а̄н̣а̄ди ча самма̄дассана’’нти. таттха кусалена вин̃н̃а̄н̣ена н̃а̄н̣асса ануппа̄депи аттана̄ катапун̃н̃а̄нуссаран̣аван̣н̣а̄рахаван̣н̣ана̄дӣнам̣ сан̇гахо, каммассаката̄н̃а̄н̣ена каммапатхасамма̄дит̣т̣хийа̄. итарам̣ пана дит̣т̣хиджугатам̣ саббесам̣ нийамалаккхан̣ам̣. йан̃хи кин̃чи пун̃н̃ам̣ каронтасса дит̣т̣хийа̄ уджубха̄венева там̣ махаппхалам̣ хоти.

имесам̣ пана саттаннам̣ пун̃н̃акирийаваттхӯнам̣ пуримехи тӣхи да̄намайа̄дӣхи пун̃н̃акирийаваттхӯхи сан̇гахо. таттха хи апача̄йанавеййа̄вачча̄ни сӣламайе, паттиануппада̄нааббханумодана̄ни да̄намайе, дхаммадесана̄савана̄ни бха̄вана̄майе, дит̣т̣хиджугатам̣ тӣсупи. тена̄ха бхагава̄ –

‘‘тӣн̣има̄ни, бхиккхаве, пун̃н̃акирийаваттхӯни. катама̄ни тӣн̣и? да̄намайам̣…пе… бха̄вана̄майам̣ пун̃н̃акирийаваттхӯ’’ти (а. ни. 8.36).

еттха ча ат̣т̣ханнам̣ ка̄ма̄вачаракусалачетана̄нам̣ васена тин̣н̣ампи пун̃н̃акирийаваттхӯнам̣ паватти хоти. йатха̄ хи пагун̣ам̣ дхаммам̣ париваттентасса екачче анусандхим̣ асаллаккхентассева гаччханти, евам̣ пагун̣ам̣ саматхавипассана̄бха̄ванам̣ ануйун̃джантасса антарантара̄ н̃а̄н̣авиппайуттачиттена̄пи манасика̄ро паваттати. саббам̣ там̣ пана махаггатакусалачетана̄нам̣ васена бха̄вана̄майамева пун̃н̃акирийаваттху хоти, на итара̄ни. га̄тха̄йа аттхо хет̣т̣ха̄ вуттойева.

пат̣хамасуттаван̣н̣ана̄ нит̣т̣хита̄.