9. бодхисин̃чакаттхераапада̄наван̣н̣ана̄

випассисса бхагаватотиа̄дикам̣ а̄йасмато бодхисин̃чакаттхерасса апада̄нам̣. айампи пуримабуддхесу ката̄дхика̄ро анека̄су джа̄тӣсу виват̣т̣ӯпаниссайа̄ни пун̃н̃а̄ни упачинанто випассисса бхагавато ка̄ле кулагехе ниббатто са̄сане паббаджитва̄ ваттапат̣ипаттийа̄ са̄санам̣ собхайанто маха̄джане бодхипӯджам̣ курума̄не дисва̄ анека̄ни пуппха̄ни сугандходака̄ни ча га̄ха̄петва̄ пӯджеси. со тена пун̃н̃ена девалоке ниббатто чха ка̄ма̄вачарасампаттийо анубхавитва̄ имасмим̣ буддхуппа̄де кулагехе ниббатто вуддхиманва̄йа саддха̄джа̄то паббаджитва̄ начирассева араха̄ ахоси.

46. со араха̄ хутва̄ джха̄напхаласукхена вӣтина̄метва̄ пуббакаммам̣ саритва̄ соманассаджа̄то пуббачарита̄пада̄нам̣ пака̄сенто випассисса бхагаватотиа̄дима̄ха. таттха висесам̣ параматтхам̣ нибба̄нам̣ пассатӣти випассӣ, висесена бхабба̄бхаббаджане пассатӣти ва̄ випассӣ, випассанто чатусаччам̣ пассанадаккханасӣлоти ва̄ випассӣ, тасса випассисса бхагавато маха̄бодхимахо ахӯти самбандхо. татра̄пи маха̄бодхӣти бодхи вуччати чатӯсу маггесу н̃а̄н̣ам̣, таметтха нисинно бхагава̄ пат̣ивиджджхатӣти кан̣ика̄рапа̄дапаруккхопи бодхиччева вуччати, махито ча со девабрахманара̄сурехи бодхи чети маха̄бодхи, махато буддхасса бхагавато бодхӣти ва̄ маха̄бодхи, тасса махо пӯджа̄ ахосӣти аттхо. сесам̣ саббаттха утта̄наттхамева̄ти.

бодхисин̃чакаттхераапада̄наван̣н̣ана̄ саматта̄.