4. адхопуппхийаттхераапада̄наван̣н̣ана̄

абхибхӯ на̄ма со бхиккхӯтиа̄дикам̣ а̄йасмато адхопуппхийаттхерасса апада̄нам̣. айампи пуримабуддхесу ката̄дхика̄ро анекесу бхавесу виват̣т̣ӯпаниссайа̄ни пун̃н̃а̄ни упачинанто сикхисса бхагавато ка̄ле кулагехе ниббатто вуддхиппатто гхара̄ва̄сам̣ сан̣т̣хапетва̄ апарабха̄ге ка̄месу а̄дӣнавам̣ дисва̄ там̣ паха̄йа исипаббаджджам̣ паббаджитва̄ пан̃ча̄бхин̃н̃а̄ат̣т̣хасама̄паттила̄бхӣ иддхӣсу ча васӣбха̄вам̣ патва̄ химавантасмим̣ пат̣ивасати. тасса сикхисса бхагавато абхибхӯ на̄ма аггаса̄вако вивека̄бхирато химавантамагама̄си. атха со та̄пасо там̣ аггаса̄вакаттхерам̣ дисва̄ тхерасса т̣хитапаббатам̣ а̄руханто паббатасса хет̣т̣ха̄талато сугандха̄ни ван̣н̣асампанна̄ни сатта пуппха̄ни гахетва̄ пӯджеси. атха со тхеро тасса̄нумоданамака̄си. сопи та̄пасо сакассамам̣ агама̄си. таттха екена аджагарена пӣл̣ито апарабха̄ге апарихӣнаджджха̄но тенева упаддавена упаддуто ка̄лам̣ катва̄ брахмалокапара̄йано хутва̄ брахмасампаттим̣ чхака̄ма̄вачарасампаттин̃ча анубхавитва̄ мануссесу мануссасампаттийо ча кхепетва̄ имасмим̣ буддхуппа̄де екасмим̣ кулагехе ниббатто вуддхиппатто бхагавато дхаммам̣ сутва̄ пасаннама̄насо паббаджитва̄ начирассева араха̄ ахоси. со апарабха̄ге аттано катапун̃н̃ана̄мена адхопуппхийаттхероти па̄кат̣о.

22. со екадивасам̣ аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто абхибхӯ на̄ма со бхиккхӯтиа̄дима̄ха. таттха сӣласама̄дхӣхи паре абхибхаватӣти абхибхӯ, кхандхама̄ра̄дима̄ре абхибхавати аджджхоттхаратӣти ва̄ абхибхӯ, сасанта̄напарасанта̄нагатакилесе абхибхавати вихесети виддхам̣сетӣти ва̄ абхибхӯ. бхиккханасӣло йа̄чанасӣлоти бхиккху, чхиннабхиннапат̣адхароти ва̄ бхиккху. абхибхӯ на̄ма аггаса̄вако со бхиккхӯти аттхо, сикхисса бхагавато аггаса̄вакоти самбандхо.

27. аджагаро мам̣ пӣл̣есӣти татха̄рӯпам̣ сӣласампаннам̣ джха̄насампаннам̣ та̄пасам̣ пуббе катапа̄пена верена ча маханто аджагарасаппо пӣл̣еси. со тенева упаддавена упаддуто апарихӣнаджджха̄но ка̄лам̣ катва̄ брахмалокапара̄йан̣о а̄си. сесам̣ саббаттха утта̄намева̄ти.

адхопуппхийаттхераапада̄наван̣н̣ана̄ саматта̄.