6. тин̣асантхарада̄йакаттхераапада̄наван̣н̣ана̄

химавантасса̄видӯретиа̄дикам̣ а̄йасмато тин̣асантхарада̄йакаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто тиссасса бхагавато ка̄ле екасмим̣ кулагехе ниббатто буддхуппа̄дато пагева уппаннатта̄ гхара̄ва̄сам̣ паха̄йа та̄пасапаббаджджам̣ паббаджитва̄ химавантасса авидӯре екам̣ сарам̣ нисса̄йа пат̣ивасати. тасмим̣ самайе тиссо бхагава̄ тасса̄нукампа̄йа а̄ка̄сена агама̄си. атха кхо со та̄пасо а̄ка̄сато оруйха т̣хитам̣ там̣ бхагавантам̣ дисва̄ пасаннама̄насо тин̣ам̣ ла̄йитва̄ тин̣асантхарам̣ катва̄ нисӣда̄петва̄ бахума̄на̄дарена пан̃чапатит̣т̣хитена вандитва̄ пат̣икут̣ико хутва̄ пакка̄ми. со йа̄вата̄йукам̣ т̣хатва̄ тато чавитва̄ девамануссесу сам̣саранто анекавидхасампаттим̣ анубхавитва̄ имасмим̣ буддхуппа̄де екасмим̣ кулагехе ниббатто вуддхиппатто саттхари пасӣдитва̄ паббаджито начирассева араха̄ ахоси.

22. со апарабха̄ге аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто химавантасса̄видӯретиа̄дима̄ха. там̣ хет̣т̣ха̄ вуттаттхамева. маха̄джа̄тассароти еттха пана саранти еттха па̄нӣйаттхика̄ двипадачатуппада̄дайо сатта̄ти сарам̣, атха ва̄ саранти еттха надӣкандара̄дайоти сарам̣, маханто ча со сайамева джа̄татта̄ саро чети маха̄джа̄тассаро. анотаттачхаддантадаха̄дайо вийа апа̄кат̣ана̄матта̄ ‘‘маха̄джа̄тассаро’’ти вуттоти дат̣т̣хаббо. сатапаттехи сан̃чханноти екекасмим̣ пуппхе сатасатапатта̄нам̣ васена сатапатто, сатапаттасетападумехи сан̃чханно гаханӣбхӯтоти аттхо. на̄на̄сакун̣ама̄лайоти анеке хам̣сакуккут̣акуккухаден̣д̣ибха̄дайо екато кун̣анти саддам̣ каронтӣти сакун̣а̄ти ладдхана̄ма̄нам̣ паккхӣнам̣ а̄лайо а̄дха̄рабхӯтоти аттхо. сесам̣ саббаттха утта̄наттхамева̄ти.

тин̣асантхарада̄йакаттхераапада̄наван̣н̣ана̄ саматта̄.