3. буддхасан̃н̃акаттхераапада̄наван̣н̣ана̄

думагге пам̣сукӯликантиа̄дикам̣ а̄йасмато буддхасан̃н̃акаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто тиссасса бхагавато ка̄ле екасмим̣ кулагехе ниббатто вуддхиппатто саддха̄джа̄то думагге лаггитам̣ бхагавато пам̣сукӯлачӣварам̣ дисва̄ пасаннама̄насо ‘‘арахаддхаджа’’нти чинтетва̄ ванданапӯджана̄дисакка̄рамака̄си. со тена пун̃н̃акаммена девамануссасампаттиманубхавитва̄ имасмим̣ буддхуппа̄де вибхавасампанне екасмим̣ кулагехе ниббатто саддха̄джа̄то паббаджитва̄ начирассева араха̄ ахоси.

9. со паттаарахатта̄дхигамо аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто думагге пам̣сукӯликантиа̄дима̄ха. таттха дхуна̄ти кампатӣти думо. духати пӯрети а̄ка̄саталанти ва̄ думо, думасса агго кот̣ӣти думагго, тасмим̣ думагге. пам̣сумива пат̣иккӯлабха̄вам̣ аманун̃н̃абха̄вам̣ улати гаччхатӣти пам̣сукӯлам̣, пам̣сукӯламева пам̣сукӯликам̣, саттхуно пам̣сукӯлам̣ думагге лаггитам̣ дисва̄ ахам̣ ан̃джалим̣ паггахетва̄ там̣ пам̣сукӯлам̣ авандим̣ пан̣а̄мамака̄синти аттхо. танти нипа̄таматтам̣. сесам̣ саббаттха утта̄наттхамева̄ти.

буддхасан̃н̃акаттхераапада̄наван̣н̣ана̄ саматта̄.