7. ваттхада̄йакаттхераапада̄наван̣н̣ана̄

паккхиджа̄то тада̄ а̄синтиа̄дикам̣ а̄йасмато ваттхада̄йакаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто аттхадассисса бхагавато ка̄ле супан̣н̣айонийам̣ ниббатто гандхама̄данапаббатам̣ гаччхантам̣ аттхадассим̣ бхагавантам̣ дисва̄ пасаннама̄насо супан̣н̣аван̣н̣ам̣ виджахитва̄ ма̄н̣авакаван̣н̣ам̣ нимминитва̄ махаггхам̣ диббаваттхам̣ а̄да̄йа бхагавантам̣ пӯджеси. сопи бхагава̄ пат̣иггахетва̄ анумоданам̣ ватва̄ пакка̄ми. со тенева соманассена вӣтина̄метва̄ йа̄вата̄йукам̣ т̣хатва̄ тато чуто девалоке ниббатто таттха апара̄парам̣ сам̣саранто пун̃н̃а̄ни анубхавитва̄ тато мануссесу мануссасампаттинти саббаттха махаггхам̣ ваттха̄бхаран̣ам̣ ладдхам̣, тато уппаннуппаннабхаве ваттхаччха̄йа̄йа гатагатат̣т̣ха̄не васанто имасмим̣ буддхуппа̄де екасмим̣ кулагехе ниббатто вин̃н̃утам̣ патто саттхари пасӣдитва̄ паббаджито начирассева чхал̣абхин̃н̃аппаттакхӣн̣а̄саво ахоси, пуббе катапун̃н̃ана̄мена ваттхада̄йакаттхероти па̄кат̣о.

45. со аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто паккхиджа̄то тада̄ а̄синтиа̄дима̄ха. таттха паккхиджа̄тоти паккхандати упалавати сакун̣о етена̄ти паккхам̣, паккхамасса аттхӣти паккхӣ, паккхийонийам̣ джа̄то ниббаттоти аттхо. супан̣н̣оти сундарам̣ пан̣н̣ам̣ паттам̣ йасса со супан̣н̣о, ва̄тагга̄хасуван̣н̣аван̣н̣аджалама̄напаттамаха̄бха̄роти аттхо. гарул̣а̄дхипоти на̄ге ган̣ханаттха̄йа гарум̣ бха̄рам̣ па̄са̄н̣ам̣ гил̣антӣти гарул̣а̄, гарул̣а̄нам̣ адхипо ра̄джа̄ти гарул̣а̄дхипо, вираджам̣ буддхам̣ аддаса̄ханти самбандхо.

ваттхада̄йакаттхераапада̄наван̣н̣ана̄ саматта̄.