8. амбада̄йакаттхераапада̄наван̣н̣ана̄

аномадассӣ бхагава̄тиа̄дикам̣ а̄йасмато амбада̄йакаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто аномадассисса бхагавато ка̄ле ва̄нарайонийам̣ ниббатто химаванте капира̄джа̄ хутва̄ пат̣ивасати. тасмим̣ самайе аномадассӣ бхагава̄ тасса̄нукампа̄йа химавантамагама̄си. атха со капира̄джа̄ бхагавантам̣ дисва̄ пасаннама̄насо сумадхурам̣ амбапхалам̣ кхуддамадхуна̄ ада̄си. атха бхагава̄ тасса пассантассева там̣ саббам̣ парибхун̃джитва̄ анумоданам̣ ватва̄ пакка̄ми. атха со соманассасампаннахадайо тенева пӣтисоманассена йа̄вата̄йукам̣ т̣хатва̄ тато чуто девалоке ниббатто апара̄парам̣ таттха диббасукхаманубхавитва̄ мануссесу ча мануссасампаттим̣ анубхавитва̄ имасмим̣ буддхуппа̄де вибхавасампанне екасмим̣ кулагехе ниббатто саттхари пасӣдитва̄ паббаджитва̄ начирассева чхал̣абхин̃н̃аппатто ахоси. пуббапун̃н̃ана̄мена амбада̄йакаттхероти па̄кат̣о.

53. со апарабха̄ге аттана̄ катакусалабӣджам̣ дисва̄ соманассаджа̄то аттано пуббачарита̄пада̄нам̣ пака̄сенто аномадассӣ бхагава̄тиа̄дима̄ха. метта̄йа апхари локе, аппама̄н̣е нирӯпадхӣти со бхагава̄ саббалоке аппама̄н̣е сатте ‘‘сукхӣ хонтӯ’’тиа̄дина̄ нирупадхи упадхивирахитам̣ катва̄ метта̄йа меттачиттена апхари паттхари вад̣д̣хесӣти аттхо.

54. капи ахам̣ тада̄ а̄синти тада̄ тасса̄гаманака̄ле капира̄джа̄ ахосинти аттхо.

амбада̄йакаттхераапада̄наван̣н̣ана̄ саматта̄.