6. сучинтитаттхераапада̄наван̣н̣ана̄

гиридуггачаро а̄синтиа̄дикам̣ а̄йасмато сучинтитаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто аттхадассисса бхагавато ка̄ле химавантаппадесе неса̄дакуле уппанно мигасӯкара̄дайо вадхитва̄ кха̄данто вихарати. тада̄ локана̄тхо лока̄нуггахам̣ сатта̄нуддайатан̃ча пат̣ичча химавантамагама̄си. тада̄ со неса̄до бхагавантам̣ дисва̄ пасаннама̄насо аттано кха̄данаттха̄йа а̄нӣтам̣ варамадхурамам̣сам̣ ада̄си. пат̣иггахеси бхагава̄ тасса̄нукампа̄йа, там̣ бхун̃джитва̄ анумоданам̣ ватва̄ пакка̄ми. со тенева пун̃н̃ена тенева соманассена тато чуто сугатӣсу сам̣саранто чха ка̄ма̄вачарасампаттийо анубхавитва̄ мануссесу чаккаваттисампаттиа̄дайо анубхавитва̄ имасмим̣ буддхуппа̄де кулагехе ниббатто саттхари пасӣдитва̄ паббаджито начирассева араха̄ ахоси.

36. чатупат̣исамбхида̄пан̃ча̄бхин̃н̃а̄дибхедам̣ патва̄ аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто гиридуггачаро а̄синтиа̄дима̄ха. гирати саддам̣ каротӣти гири, ко со? сила̄пам̣сумайапаббато, дут̣т̣ху дуккхена гаманӣйам̣ дуггам̣, гирӣхи дуггам̣ гиридуггам̣, дуггамоти аттхо. тасмим̣ гиридугге паббатантаре чаро чаран̣асӣло а̄сим̣ ахосим̣. абхиджа̄това кесарӣти абхи висесена джа̄то ниббатто кесарӣва кесарасӣхо ива гиридуггасмим̣ чара̄мӣти аттхо.

40. гиридуггам̣ пависим̣ аханти ахам̣ тада̄ тена мам̣сада̄нена пӣтисоманассаджа̄то паббатантарам̣ па̄висим̣. сесам̣ утта̄наттхамева̄ти.

сучинтитаттхераапада̄наван̣н̣ана̄ саматта̄.