5. бхисада̄йакаттхераапада̄наван̣н̣ана̄

вессабхӯ на̄ма на̄мена̄тиа̄дикам̣ а̄йасмато бхисада̄йакаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто вессабхусса бхагавато ка̄ле химавантасмим̣ хаттхийонийам̣ ниббатто тасмим̣ пат̣ивасати. тасмим̣ самайе вессабхӯ бхагава̄ вивекака̄мо химавантамагама̄си. там̣ дисва̄ со хаттхина̄го пасаннама̄насо бхисамул̣а̄лам̣ гахетва̄ бхагавантам̣ бходжеси. со тена пун̃н̃акаммена хаттхийонито чуто девалоке уппаджджитва̄ таттха чха ка̄ма̄вачарасампаттийо анубхавитва̄ мануссаттама̄гато мануссесу чаккаваттисампаттиа̄дайо анубхавитва̄ имасмим̣ буддхуппа̄де маха̄бхоге ан̃н̃атарасмим̣ куле ниббатто пуббава̄сана̄балена саттхари пасанно паббаджитва̄ начирассева араха̄ ахоси, со пуббе катакусалана̄мена бхисада̄йакаттхероти па̄кат̣о.

29. со аттано пуббакаммам̣ саритва̄ пуббачарита̄пада̄нам̣ дассенто вессабхӯ на̄ма на̄мена̄тиа̄дима̄ха. таттха вессабхӯти вессам̣ бхуна̄ти атиккаматӣти вессабхӯ. атха ва̄ вессе ва̄н̣иджакамме ва̄ ка̄мара̄га̄дике ва̄ кусала̄дикамме ва̄ ваттхука̄макилесака̄ме ва̄ бхуна̄ти абхибхаватӣти вессабхӯ, со на̄мена вессабхӯ на̄ма бхагава̄. исӣнам̣ татийо ахӯти кусаладхамме есати гавесатӣти иси, ‘‘випассӣ, сикхӣ, вессабхӯ’’ти вуттатта̄ татийо иси татийо бхагава̄ аху ахосӣти аттхо. ка̄нанам̣ ванамоггайха̄ти ка̄нанасан̇кха̄там̣ ванам̣ огайха огахетва̄ па̄висӣти аттхо.

30. бхисамул̣а̄лам̣ ган̣хитва̄ти двипадачатуппада̄нам̣ чха̄такам̣ бхисати хим̣сати вина̄сетӣти бхисам̣, ко со? падумакандо, бхисан̃ча мул̣а̄лан̃ча бхисамул̣а̄лам̣, там̣ бхисамул̣а̄лам̣ гахетва̄ти аттхо.

31. карена ча пара̄мат̣т̣хоти там̣ майа̄ диннада̄нам̣, вессабхӯварабуддхина̄ уттамабуддхина̄ вессабхуна̄ карена хаттхаталена пара̄мат̣т̣хо катасампхассо ахоси. сукха̄хам̣ на̄бхиджа̄на̄ми, самам̣ тена кутоттаринти тена сукхена самам̣ сукхам̣ на̄бхиджа̄на̄ми, тато уттарим̣ тато парам̣ тато адхикам̣ сукхам̣ кутоти аттхо. сесам̣ найа̄нуса̄рена сувин̃н̃еййанти.

бхисада̄йакаттхераапада̄наван̣н̣ана̄ саматта̄.