4. параппаса̄дакаттхераапада̄наван̣н̣ана̄

усабхам̣ паварам̣ вӣрантиа̄дикам̣ а̄йасмато параппаса̄дакаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто сиддхаттхасса бхагавато ка̄ле бра̄хман̣акуле ниббатто тин̣н̣ам̣ веда̄нам̣ па̄рагӯ итиха̄сапан̃чама̄нам̣ падако веййа̄каран̣о санигхан̣д̣укет̣убха̄нам̣ са̄ккхараппабхеда̄нам̣ лока̄йатамаха̄пурисалаккхан̣есу анавайо на̄мена селабра̄хман̣оти па̄кат̣о сиддхаттхам̣ бхагавантам̣ дисва̄ дваттим̣самаха̄пурисалаккхан̣ехи асӣтианубйан̃джанехи ча̄ти сайам̣ собхама̄нам̣ дисва̄ пасаннама̄насо анекехи ка̄ран̣ехи анека̄хи упама̄хи тхоманам̣ пака̄сеси. со тена пун̃н̃акаммена девалоке саккама̄ра̄дайо чха ка̄ма̄вачарасампаттийо анубхавитва̄ мануссесу чаккаваттисампаттим̣ анубхавитва̄ имасмим̣ буддхуппа̄де вибхавасампанне екасмим̣ кулагехе ниббатто вин̃н̃утам̣ патто саттхари пасӣдисва̄ паббаджито начирассева чатупат̣исамбхида̄чхал̣абхин̃н̃аппатто маха̄кхӣн̣а̄саво ахоси, буддхасса тхутийа̄ сатта̄нам̣ саббесам̣ читтаппаса̄дакаран̣ато параппаса̄дакаттхероти па̄кат̣о.

20. екадивасам̣ аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто усабхам̣ паварам̣ вӣрантиа̄дима̄ха. таттха усабханти васабхо нисабхо висабхо а̄сабхоти чатта̄ро джет̣т̣хапун̇гава̄. таттха гавасатаджет̣т̣хако васабхо, гавасахассаджет̣т̣хако нисабхо, гавасатасахассаджет̣т̣хако висабхо, гавакот̣исатасахассаджет̣т̣хако а̄сабхоти ча йасса кассачи тхутим̣ каронта̄ бра̄хман̣апан̣д̣ита̄ бахуссута̄ аттано аттано пан̃н̃а̄васена тхутим̣ каронти, буддха̄нам̣ пана сабба̄ка̄рена тхутим̣ ка̄тум̣ саматтхо екопи наттхи. аппамеййо хи буддхо. вуттан̃хетам̣ –

‘‘буддхопи буддхасса бхан̣еййа ван̣н̣ам̣, каппампи че ан̃н̃амабха̄сама̄но;

кхӣйетха каппо чирадӣгхамантаре, ван̣н̣о на кхӣйетха татха̄гатасса̄’’ти. (дӣ. ни. ат̣т̣ха. 1.304; 3.141; ма. ни. ат̣т̣ха. 2.425; уда̄. ат̣т̣ха. 53) –

а̄дикам̣. айампи бра̄хман̣о мукха̄рӯл̣хавасена екапасӣданавасена ‘‘а̄сабха’’нти ваттаббе ‘‘усабха’’нтиа̄дима̄ха. варитаббо паттхетабботи варо. анекесу каппасатасахассесу катавӣрийатта̄ вӣро. махантам̣ сӣлаккхандха̄дикам̣ есати гавесатӣти махесӣ, там̣ махесим̣ буддхам̣. висесена килесакхандхама̄ра̄дайо ма̄ре джитава̄ти виджита̄вӣ, там̣ виджита̄винам̣ самбуддхам̣. суван̣н̣асса ван̣н̣о ива ван̣н̣о йасса самбуддхасса со суван̣н̣аван̣н̣о, там̣ суван̣н̣аван̣н̣ам̣ самбуддхам̣ дисва̄ ко на̄ма сатто наппасӣдатӣти.

параппаса̄дакаттхераапада̄наван̣н̣ана̄ саматта̄.