10. пуппхачан̇кот̣ийаттхераапада̄наван̣н̣ана̄

абхӣтарӯпам̣ сӣхам̣ ва̄тиа̄дикам̣ а̄йасмато пуппхачан̇кот̣ийаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто сикхисса бхагавато ка̄ле екасмим̣ кулагехе ниббатто вин̃н̃утам̣ патто маха̄вибхавасампанно саттхари пасӣдитва̄ пасанна̄ка̄рам̣ дассенто суван̣н̣аван̣н̣ам̣ аноджапуппхамочинитва̄ чан̇кот̣акам̣ пӯретва̄ бхагавантам̣ пӯджетва̄ ‘‘бхагава̄, имасса ниссандена ниббаттаниббаттат̣т̣ха̄не суван̣н̣аван̣н̣о пӯджанӣйо хутва̄ нибба̄нам̣ па̄пун̣еййа’’нти паттханамака̄си. со тена пун̃н̃акаммена девамануссесу ниббатто саббаттха пӯджито суван̣н̣аван̣н̣о абхирӯпо ахоси. со апарабха̄ге имасмим̣ буддхуппа̄де вибхавасампанне екасмим̣ кулагехе ниббатто вуддхиппатто саттхари пасӣдитва̄ паббаджито випассанам̣ вад̣д̣хетва̄ начирассева араха̄ ахоси.

68-9. со паттаарахаттапхало аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто абхӣтарӯпам̣ сӣхам̣ ва̄тиа̄дима̄ха. таттха сӣханти двипадачатуппада̄дайо сатте абхибхавати аджджхоттхаратӣти сӣхо, абхӣтарӯпо абхӣтасабха̄во, там̣ абхӣтарӯпам̣ сӣхам̣ ива нисиннам̣ пӯджесинти самбандхо. паккхӣнам̣ аггам̣ гарул̣ара̄джам̣ ива паварам̣ уттамам̣ бйаггхара̄джам̣ ива абхи висесена джа̄там̣ саббасӣха̄нам̣ висесам̣ кесарасӣхам̣ ива тилокасса саран̣ам̣ сикхим̣ самма̄самбуддхам̣. ким̣ бхӯтам̣? анеджам̣ никкилесам̣ кхандхама̄ра̄дӣхи апара̄джитам̣ нисиннам̣ сикхинти самбандхо. ма̄ран̣а̄нагганти саббакилеса̄нам̣ ма̄ран̣е сосане виддхам̣сане аггам̣ сет̣т̣хам̣ килесе ма̄рента̄нам̣ паччекабуддхабуддхаса̄вака̄нам̣ виджджама̄на̄нампи тесам̣ агганти аттхо. бхиккхусан̇гхапураккхатам̣ парива̄ритам̣ парива̄ретва̄ нисиннам̣ сикхинти самбандхо.

70. чан̇кот̣аке т̣хапетва̄на̄ти уттамам̣ аноджапуппхам̣ каран̣д̣аке пӯретва̄ сикхӣсамбуддхам̣ сет̣т̣хам̣ самокирим̣ пӯджесинти аттхо.

пуппхачан̇кот̣ийаттхераапада̄наван̣н̣ана̄ саматта̄.

саттамаваггаван̣н̣ана̄ саматта̄.