9. падуматтхераапада̄наван̣н̣ана̄

чатусаччам̣ пака̄сентотиа̄дикам̣ а̄йасмато падуматтхерасса апада̄нам̣. айампи пуримабуддхесу катакусаласамбха̄ро падумуттарамунина̄ дхаммападжджоте джотама̄не екасмим̣ кулагехе ниббатто гхара̄ва̄сам̣ сан̣т̣хапетва̄ бхогасампанноти па̄кат̣о. со саттхари пасӣдитва̄ маха̄джанена саддхим̣ дхаммам̣ сун̣анто дхаджена саха падумакала̄пам̣ гахетва̄ ат̣т̣ха̄си, садхаджам̣ там̣ падумакала̄пам̣ а̄ка̄самуккхипим̣, там̣ аччхарийам̣ дисва̄ ативийа соманассаджа̄то ахоси. со йа̄ваджӣвам̣ кусалам̣ катва̄ джӣвитапарийоса̄не сагге ниббатто дхаджамива чхака̄ма̄вачаре па̄кат̣о пӯджито ча диббасампаттиманубхавитва̄ мануссесу ча чаккаваттисампаттиманубхавитва̄ имасмим̣ буддхуппа̄де вибхавасампанне саддха̄сампанне екасмим̣ кулагехе ниббатто вуддхиманва̄йа саддха̄джа̄то пан̃чавассикова паббаджитва̄ начирассева араха̄ хутва̄ катапун̃н̃ана̄мена падуматтхероти па̄кат̣о.

67. аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто чатусаччам̣ пака̄сентотиа̄дима̄ха. таттха саччанти татхам̣ авитатхам̣ авипарӣтам̣ саччам̣, дуккхасамудайаниродхамаггавасена чатта̄ри сачча̄ни сама̄хат̣а̄нӣти чатусаччам̣, там̣ чатусаччам̣ пака̄сенто локе па̄кат̣ам̣ каронтоти аттхо. варадхаммаппаваттакоти уттамадхаммаппаваттако пака̄сакоти аттхо. аматам̣ вут̣т̣хинти аматамаха̄нибба̄навут̣т̣хидха̄рам̣ павассанто паггхаранто садевакам̣ локам̣ тементо саббакилесапарил̣а̄хам̣ нибба̄пенто дхаммавассам̣ вассатӣти аттхо.

68. садхаджам̣ падумам̣ гайха̄ти дхаджена саха екато катва̄ падумам̣ падумакала̄пам̣ гахетва̄ти аттхо. ад̣д̣хакосе т̣хито аханти убхо уккхипитва̄ т̣хито аханти аттхо. сесам̣ саббаттха утта̄наттхамева̄ти.

падуматтхераапада̄наван̣н̣ана̄ саматта̄.