7. пан̃чадӣпакаттхераапада̄наван̣н̣ана̄
падумуттарабуддхасса̄тиа̄дикам̣ а̄йасмато пан̃чадӣпакаттхерасса апада̄нам̣. айампи пуримабуддхесу ката̄дхика̄ро уппаннуппаннабхавесу виват̣т̣ӯпаниссайа̄ни пун̃н̃а̄ни упачинанто падумуттарасса бхагавато ка̄ле кулагехе ниббатто вуддхиманва̄йа гхара̄ва̄се васанто бхагавато дхаммам̣ сутва̄ самма̄дит̣т̣хийам̣ патит̣т̣хито саддхо пасанно маха̄джанехи бодхипӯджам̣ кайирама̄нам̣ дисва̄ сайампи бодхим̣ парива̄ретва̄ дӣпам̣ джа̄летва̄ пӯджеси. со тена пун̃н̃акаммена девамануссесу сам̣саранто чаккаваттисампаттиа̄дайо анубхавитва̄ саббаттхева уппаннабхаве джалама̄но джотисампаннавима̄на̄дӣсу васитва̄ имасмим̣ буддхуппа̄де екасмим̣ вибхавасампанне кулагехе ниббатто вуддхиппатто саддха̄джа̄то паббаджитва̄ начирассева араха̄ ахоси, дӣпапӯджа̄ниссандена дӣпакаттхероти па̄кат̣о.
50. со екадивасам̣ аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто падумуттарабуддхасса̄тиа̄дима̄ха. там̣ вуттаттхамева. уджудит̣т̣хи ахосаханти ван̇кам̣ миччха̄дит̣т̣хим̣ чхад̣д̣етва̄ уджу аван̇кам̣ нибба̄на̄бхимукхам̣ па̄пун̣анасамма̄дит̣т̣хи ахосинти аттхо.
51. падӣпада̄нам̣ па̄да̄синти еттха пака̄рена диббати джотатӣти падӣпо, тасса да̄нам̣ падӣпада̄нам̣, там̣ ада̄сим̣ падӣпапӯджам̣ ака̄синти аттхо. сесам̣ саббаттха утта̄наттхамева̄ти.
пан̃чадӣпакаттхераапада̄наван̣н̣ана̄ саматта̄.