6. сапарива̄ра̄санаттхераапада̄наван̣н̣ана̄

падумуттарабуддхасса̄тиа̄дикам̣ а̄йасмато сапарива̄ра̄санаттхерасса апада̄нам̣. сопи пуримабуддхесу ката̄дхика̄ро таттха таттха бхавесу виват̣т̣ӯпаниссайа̄ни пун̃н̃а̄ни упачинанто падумуттарасса бхагавато ка̄ле вибхавасампанне кулагехе ниббатто вуддхиппатто саддха̄джа̄то са̄сане пасанно да̄напхалам̣ саддаханто на̄наггарасабходжанена бхагавато пин̣д̣апа̄там̣ ада̄си, датва̄ ча пана бходжанаса̄ла̄йам̣ бходжанаттха̄йа нисинна̄санам̣ джа̄тисуманамаллика̄дӣхи алан̇кари. бхагава̄ ча бхатта̄нумоданамака̄си. со тена пун̃н̃акаммена девамануссесу сам̣саранто анекавидхам̣ сампаттим̣ анубхавитва̄ имасмим̣ буддхуппа̄де вибхавасампанне кулагехе ниббатто вуддхиманва̄йа саддхо пасанно паббаджитва̄ на чирассева араха̄ ахоси.

43. со евам̣ паттасантипадо ‘‘кена ну кхо пун̃н̃ена идам̣ сантипадам̣ ануппатта’’нти н̃а̄н̣ена упадха̄ренто пуббакаммам̣ дисва̄ соманассаджа̄то пуббачарита̄пада̄нам̣ пака̄сенто падумуттарабуддхасса̄тиа̄дима̄ха. там̣ вуттаттхамева. пин̣д̣апа̄там̣ ада̄саханти таттха таттха ладдха̄нам̣ пин̣д̣а̄нам̣ кабал̣ам̣ кабал̣ам̣ катва̄ па̄таббато кха̄дитаббато а̄ха̄ро пин̣д̣апа̄то, там̣ пин̣д̣апа̄там̣ бхагавато ада̄сим̣, бхагавантам̣ бходжесинти аттхо.

44. акиттайи пин̣д̣апа̄танти майа̄ диннапин̣д̣апа̄тасса гун̣ам̣ а̄нисам̣сам̣ пака̄сесӣти аттхо.

48. сам̣вуто па̄тимоккхасминти па̄тимоккхасам̣варасӣлена сам̣вуто пихито пат̣иччханноти аттхо. индрийесу ча пан̃часӯти чаккхундрийа̄дӣсу пан̃часу индрийесу рӯпа̄дӣхи гопито индрийасам̣варасӣлан̃ча гопитоти аттхо. сесам̣ сувин̃н̃еййамева̄ти.

сапарива̄ра̄санаттхераапада̄наван̣н̣ана̄ саматта̄.