5. опавайхаттхераапада̄наван̣н̣ана̄

падумуттарабуддхасса̄тиа̄дикам̣ а̄йасмато опавайхаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто падумуттараджина̄дичче локе па̄тубхӯте екасмим̣ вибхавасампаннакуле ниббатто вуддхиманва̄йа махаддхано маха̄бхого гхара̄ва̄сам̣ васама̄но са̄сане пасанно саттхари паса̄дабахума̄но а̄джа̄нӣйена синдхавена пӯджам̣ ака̄си, пӯджетва̄ ча пана ‘‘буддха̄дӣнам̣ саман̣а̄нам̣ хаттхиасса̄дайо на каппанти, каппийабхан̣д̣ам̣ дасса̄мӣ’’ти чинтетва̄ там̣ аггха̄петва̄ тадаггханакена каха̄пан̣ена каппийам̣ каппа̄сикакамбалакоджава̄дикам̣ чӣварам̣ каппӯратаккола̄дикам̣ бхесаджджапариккха̄ран̃ча ада̄си. со тена пун̃н̃акаммена йа̄вата̄йукам̣ т̣хатва̄ тато чуто девесу ча мануссесу ча хаттхиасса̄дианекава̄ханасампанно сукхам̣ анубхавитва̄ имасмим̣ буддхуппа̄де екасмим̣ кулагехе ниббатто вин̃н̃утам̣ патто саддха̄сампанно са̄сане паббаджитва̄ каммат̣т̣ха̄нам̣ гахетва̄ випассанам̣ вад̣д̣хетва̄ маггапат̣ипа̄т̣ийа̄ арахатте патит̣т̣ха̄си, пуббе катапун̃н̃асамбха̄равасена опавайхаттхероти па̄кат̣о ахоси.

33. со ‘‘кена ну кхо ка̄ран̣ена идам̣ майа̄ сантипадам̣ адхигата’’нти упадха̄ренто пуббакаммам̣ н̃а̄н̣ена паччаккхато н̃атва̄ соманассаджа̄то пуббачарита̄пада̄нам̣ уда̄навасена пака̄сенто падумуттарабуддхасса̄тиа̄дима̄ха. там̣ вуттаттхамева. а̄джа̄нӣйамада̄саханти а̄джа̄нӣйам̣ уттамаджа̄тисиндхавам̣ ахам̣ ада̄сим̣ пӯджесинти аттхо.

35. сапаттабха̄роти сасса аттано патта̄ни ат̣т̣ха париккха̄ра̄ни бха̄ра̄ни йасса со сапаттабха̄ро, ат̣т̣хапариккха̄райуттоти аттхо.

36. кхаманӣйамада̄саханти кхаманӣйайоггам̣ чӣвара̄дикаппийапариккха̄ранти аттхо.

40. чаримоти парийоса̄но кот̣иппатто бхавоти аттхо. сесам̣ сувин̃н̃еййамева̄ти.

опавайхаттхераапада̄наван̣н̣ана̄ саматта̄.