8. ломасакан̇гийаттхераапада̄наван̣н̣ана̄

ат̣т̣хама̄пада̄не имамхи бхаддаке каппетиа̄дикам̣ а̄йасмато ломасакан̇гийаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто кассапасса бхагавато ка̄ле бра̄хман̣акуле ниббатто саддхо пасанно ахоси. апаро чандано на̄ма тасса саха̄йо ча̄си. те двепи саттху сантике дхаммам̣ сутва̄ пасаннама̄наса̄ паббаджитва̄ йа̄ваджӣвам̣ сӣлам̣ раккхитва̄ супарисуддхасӣла̄ тато чута̄ девалоке ниббаттитва̄ екам̣ буддхантарам̣ диббасукхам̣ анубхавим̣су. тесу айам̣ имасмим̣ буддхуппа̄де са̄кийакуле ниббаттитва̄ апаро чандано девапутто хутва̄ та̄ватим̣сабхаване ниббатти. атха со сакйакулаппаса̄дакена ка̄л̣уда̄йина̄ а̄ра̄дхитена бхагавата̄ сакйара̄джӯнам̣ ма̄намаддана̄йа катам̣ вессантарадхаммадесана̄йам̣ (джа̄. 2.22.1655 а̄дайо) поккхаравассаиддхипа̄т̣иха̄рийам̣ дисва̄ пасаннама̄насо паббаджитва̄ маджджхиманика̄йе вуттам̣ бхаддекараттасуттантадесанам̣ сутва̄ аран̃н̃ава̄сам̣ васанто бхаддекараттасуттантадесана̄нуса̄санам̣ (ма. ни. 3.286 а̄дайо) саритва̄ тадануса̄рена н̃а̄н̣ам̣ песетва̄ каммат̣т̣ха̄нам̣ манаси каритва̄ арахаттам̣ па̄пун̣и.

225. арахаттам̣ патва̄ аттано пуббакаммам̣ саритва̄ сан̃джа̄тасоманассо пуббачарита̄пада̄нам̣ пака̄сенто имамхи бхаддаке каппетиа̄дима̄ха. таттха каппо та̄ва чатуббидхо – са̄ракаппо, варакаппо, ман̣д̣акаппо, бхаддакаппоти. тесу йасмим̣ каппе еко буддхо уппаджджати, айам̣ са̄ракаппо на̄ма. йасмим̣ две ва̄ тайо ва̄ буддха̄ уппаджджанти, айам̣ варакаппо на̄ма. йасмим̣ чатта̄ро буддха̄ уппаджджанти, айам̣ ман̣д̣акаппо на̄ма. йасмим̣ пан̃ча буддха̄ уппаджджанти, айам̣ бхаддакаппо на̄ма. ан̃н̃аттха пана –

‘‘са̄ракаппо ман̣д̣акаппо, са̄раман̣д̣акаппо татха̄;

варакаппо бхаддакаппо, каппа̄ пан̃чавидха̄ сийум̣.

‘‘еко две тайо чатта̄ро, пан̃ча буддха̄ йатха̄ккамам̣;

етесу пан̃чакаппесу, уппаджджанти вина̄йака̄’’ти. –

евам̣ пан̃ча каппа̄ вутта̄. тесу айам̣ каппо ‘‘какусандхо кон̣а̄гамано кассапо готамо меттеййо’’ти пан̃чабуддхапат̣иман̣д̣итатта̄ бхаддакаппо на̄ма джа̄то.

тасма̄ имасмим̣ бхаддакаппамхи кассапо на̄йако уппаджджӣти самбандхо. сесам̣ утта̄наттхамева̄ти.

ломасакан̇гийаттхераапада̄наван̣н̣ана̄ саматта̄.