9. ванаваччхаттхераапада̄наван̣н̣ана̄

навама̄пада̄не имамхи бхаддаке каппетиа̄дикам̣ а̄йасмато ванаваччхаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто кассапасса бхагавато ка̄ле кулагехе ниббатто вин̃н̃утам̣ патва̄ саттху дхаммадесанам̣ сутва̄ саддха̄джа̄то паббаджитва̄ парисуддхам̣ брахмачарийам̣ чаритва̄ тато чуто девалоке ниббатто, тато чуто аран̃н̃а̄йатане бхиккхӯнам̣ самӣпе капотайонийам̣ ниббатто. тесу меттачитто дхаммам̣ сутва̄ тато чуто девамануссесу сам̣саранто имасмим̣ буддхуппа̄де капилаваттхусмим̣ бра̄хман̣акуле ниббатти. тасса ма̄тукуччхигатака̄лейева ма̄ту дохал̣о удапа̄ди ване васитум̣ ване виджа̄йитум̣. тато иччха̄нурӯпавасена ване васантийа̄ габбхавут̣т̣ха̄нам̣ ахоси. габбхато никкхантан̃ча нам̣ ка̄са̄вакхан̣д̣ена пат̣иггахесум̣. тада̄ бодхисаттасса уппаннака̄ло, ра̄джа̄ там̣ кума̄рам̣ а̄хара̄петва̄ сахева посеси. атха бодхисатто маха̄бхиниккхаманам̣ никкхамитва̄ паббаджитва̄ чхаббаса̄ни дуккарака̄рикам̣ катва̄ буддхе джа̄те со маха̄кассапасса сантикам̣ гантва̄ тассова̄де пасанно тасса сантика̄ буддхуппа̄дабха̄вам̣ сутва̄ саттху сантикам̣ гантва̄ дхаммам̣ сутва̄ паббаджитва̄ начирассева чхал̣абхин̃н̃о араха̄ ахоси.

251. со арахаттам̣ патва̄ аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто имамхи бхаддаке каппетиа̄дима̄ха. таттха брахмабандху маха̄йасоти еттха бра̄хман̣а̄нам̣ бандху н̃а̄такоти бра̄хман̣абандхӯти ваттаббе га̄тха̄бандхасукхаттхам̣ ‘‘брахмабандхӯ’’ти вуттанти ведитаббам̣. локаттайабйа̄пакайасатта̄ маха̄йасо. сесам̣ саббам̣ сувин̃н̃еййамева̄ти.

ванаваччхаттхераапада̄наван̣н̣ана̄ саматта̄.