6. падумаччхаданийаттхераапада̄наван̣н̣ана̄

ниббуте локана̄тхамхӣтиа̄дикам̣ а̄йасмато падумаччхаданийаттхерасса апада̄нам̣. айампи пуримабуддхесу катапун̃н̃асамбха̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто випассисса бхагавато ка̄ле екасмим̣ кулагехе ниббатто вин̃н̃утам̣ патто ратанаттайе пасанно париниббутасса випассисса бхагавато читакам̣ падумапуппхехи пӯджеси. со тенева читтаппаса̄дена йа̄вата̄йукам̣ т̣хатва̄ тато сугатӣсуйева сам̣саранто диббасампаттим̣ мануссасампаттин̃ча̄ти две сампаттийо анекаккхаттум̣ анубхавитва̄ имасмим̣ амха̄кам̣ самма̄самбуддхака̄ле екасмим̣ кулагехе ниббатто вин̃н̃утам̣ патто саттхари пасӣдитва̄ са̄сане паббаджито гхат̣енто ва̄йаманто начирассева араха̄ ахоси. тасса раттит̣т̣ха̄надива̄т̣т̣ха̄на̄дӣсу таттха таттха вихарантасса виха̄ро падумапуппхехи чха̄дӣйати, тена со падумаччхаданийаттхероти па̄кат̣о.

83. аттано пуббакаммам̣ саритва̄ соманассавасена пуббачарита̄пада̄нам̣ пака̄сенто ниббуте локана̄тхамхӣтиа̄дима̄ха. таттха ниббутети кхандхапаринибба̄нена париниббуте саттхари, випассисса самма̄самбуддхасса сарӣре читама̄нийама̄не читаке а̄ропите супхуллам̣ падумакала̄пам̣ ахам̣ гахетва̄ читакам̣ а̄ропайим̣ пӯджесинти аттхо. сесага̄тха̄су хет̣т̣ха̄ вуттанайатта̄ утта̄наттхамева̄ти.

падумаччхаданийаттхераапада̄наван̣н̣ана̄ саматта̄.