2. сон̣акол̣ивисаттхераапада̄наван̣н̣ана̄

аномадассисса мунинотиа̄дикам̣ а̄йасмато кол̣ивисаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто аномадассисса бхагавато ка̄ле екасмим̣ кулагехе ниббатто вайаппатто путтада̄рехи вад̣д̣хито вибхавасампанно бхагавато чан̇каманаттха̄йа собханам̣ чан̇камам̣ ка̄ретва̄ судха̄парикаммам̣ ка̄ретва̄ а̄да̄саталамива самам̣ виджджотама̄нам̣ катва̄ дӣпадхӯпапуппха̄дӣхи саджджетва̄ бхагавато ниййа̄детва̄ буддхаппамукхам̣ бхиккхусан̇гхам̣ пан̣ӣтена̄ха̄рена пӯджеси. со евам̣ йа̄ваджӣвам̣ пун̃н̃а̄ни катва̄ тато чавитва̄ девалоке ниббатто. таттха па̄л̣ийа̄ вуттанайена диббасампаттим̣ анубхавитва̄ антара̄ окка̄какулаппасутоти там̣ саббам̣ па̄л̣ийа̄ вутта̄нуса̄рена ведитаббам̣. паччхимабхаве пана колийара̄джавам̣се джа̄то вайаппатто кот̣иаггханакасса кан̣н̣апил̣андханасса дха̄ритатта̄ кот̣икан̣н̣оти, кут̣икан̣н̣оти ча па̄кат̣о ахоси. со бхагавати пасанно дхаммам̣ сутва̄ пат̣иладдхасаддхо паббаджитва̄ випассанам̣ вад̣д̣хетва̄ начирассева арахаттам̣ па̄пун̣и.

25. со араха̄ хутва̄ аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто аномадассисса мунинотиа̄дима̄ха. таттха аномадассисса̄ти аномам̣ ала̄макам̣ сундарам̣ дассанам̣ дваттим̣самаха̄пурисалаккхан̣апат̣иман̣д̣итатта̄ бйа̄маппабха̄ман̣д̣алопасобхитатта̄ а̄рохапарин̣а̄хена саманна̄гататта̄ ча дассанӣйам̣ сарӣрам̣ йасса бхагавато со аномадассӣ, тасса аномадассисса муниноти аттхо. та̄диноти ит̣т̣ха̄нит̣т̣хесу акампийасабха̄васса. судха̄йа лепанам̣ катва̄ти судха̄йа авалиттам̣ катва̄ дӣпадхӯпапуппхадхаджапат̣а̄ка̄дӣхи ча алан̇катам̣ чан̇камам̣ ка̄райим̣ ака̄синти аттхо. сесага̄тха̄нам̣ аттхо па̄л̣ийа̄ ануса̄рена сувин̃н̃еййова.

35. парива̄расампаттидханасампаттисан̇кха̄там̣ йасам̣ дха̄ретӣти йасодхаро, саббе ете саттасаттатичаккаваттира̄джа̄но йасодхарана̄мена екана̄мака̄ти самбандхо.

52. ан̇гӣрасоти ан̇гато сарӣрато ниггата̄ расми йасса со ан̇гӣрасо, чхандадосамохабхайа̄гатӣхи ва̄ па̄па̄ча̄равасена ва̄ чатура̄па̄йам̣ на гаччхатӣти на̄го, маханто пӯджито ча со на̄го чети маха̄на̄го. сесам̣ утта̄наттхамева̄ти.

кол̣ивисаттхераапада̄наван̣н̣ана̄ саматта̄.