9. дхаммачаккикаттхераапада̄наван̣н̣ана̄

сиддхаттхасса бхагаватотиа̄дикам̣ а̄йасмато дхаммачаккикаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто сиддхаттхасса бхагавато ка̄ле екасмим̣ кулагехе ниббатто вуддхиппатто путтада̄рехи вад̣д̣хито вибхавасампанно маха̄бхого, со ратанаттайе пасанно саддха̄джа̄то дхаммасабха̄йам̣ дхамма̄санасса пит̣т̣хито ратанамайам̣ дхаммачаккам̣ ка̄ретва̄ пӯджеси. со тена пун̃н̃акаммена девамануссесу ниббаттат̣т̣ха̄несу саккасампаттим̣ чаккаваттисампаттин̃ча анубхавитва̄ камена имасмим̣ буддхуппа̄де екасмим̣ кулагехе уппанно вибхавасампанно сан̃джа̄тасаддхо паббаджитва̄ випассанам̣ вад̣д̣хетва̄ начирассева арахаттам̣ патва̄ пуббе катакусалана̄масадисана̄мена дхаммачаккикаттхероти па̄кат̣о джа̄то ахоси.

102. со пун̃н̃асамбха̄ра̄нурӯпена паттаарахаттапхало аттано пуббакаммам̣ саритва̄ джа̄тасоманассо пуббачарита̄пада̄нам̣ пака̄сенто сиддхаттхасса бхагаватотиа̄дима̄ха. сӣха̄санасса саммукха̄ти сӣхасса бхагавато нисиннасса саммукха̄ буддха̄санасса абхимукхат̣т̣ха̄нети аттхо, дхаммачаккам̣ ме т̣хапитанти майа̄ дхаммачакка̄ка̄рена убхато сӣхарӯпам̣ дассетва̄ маджджхе а̄да̄сасадисам̣ ка̄ретва̄ катам̣ дхаммачаккам̣ т̣хапитам̣ пӯджитам̣. ким̣ бхӯтам̣? вин̃н̃ӯхи медха̄вӣхи ‘‘атӣва сундара’’нти ван̣н̣итам̣ тхомитам̣ сукатам̣ дхаммачакканти самбандхо.

103. ча̄руван̣н̣ова собха̄мӣти суван̣н̣аван̣н̣о ива собха̄ми вироча̄мӣти аттхо. ‘‘чатуван̣н̣ехи собха̄мӣ’’типи па̄т̣хо, тасса кхаттийабра̄хман̣авессасуддаджа̄тисан̇кха̄техи чатӯхи ван̣н̣ехи собха̄ми вироча̄мӣти аттхо. сайоггабалава̄ханоти суван̣н̣асивика̄дӣхи йоггехи ча сена̄патимаха̄матта̄дӣхи севакехи балехи ча хаттхиассаратхасан̇кха̄техи ва̄ханехи ча сахитоти аттхо. бахуджджана̄ бахаво манусса̄ ануйанта̄ мама̄нуваттанта̄ ниччам̣ ниччака̄лам̣ парива̄рентӣти самбандхо. сесам̣ сувин̃н̃еййамева̄ти.

дхаммачаккикаттхераапада̄наван̣н̣ана̄ саматта̄.