7. пулинапӯджакаттхераапада̄наван̣н̣ана̄

випассисса бхагаватотиа̄дикам̣ а̄йасмато пулинапӯджакаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто випассисса бхагавато ка̄ле екасмим̣ куле ниббатто са̄сане пасанначитто четийан̇ган̣абодхийан̇ган̣есу пура̄н̣ава̄лукам̣ апанетва̄ навам̣ мутта̄даласадисапан̣д̣арапулинам̣ окиритва̄ ма̄л̣акам̣ алан̇кари. тена каммена со девалоке ниббатто таттха диббехи ратанехи виджджотама̄не анекайоджане канакавима̄не диббасампаттим̣ анубхавитва̄ тато чуто мануссалоке саттаратанасампанно чаккаваттӣ ра̄джа̄ хутва̄ мануссасампаттим̣ анубхавитва̄ апара̄парам̣ сам̣саранто имасмим̣ буддхуппа̄де вибхавасампанне екасмим̣ куле ниббатто са̄сане пасанно паббаджитва̄ випассанам̣ вад̣д̣хетва̄ арахаттам̣ па̄пун̣и. со аттано катапун̃н̃ана̄масадисена на̄мена пулинапӯджакаттхероти па̄кат̣о.

165. со аттано пуббакаммам̣ саритва̄ соманассаджа̄то пуббачарита̄пада̄нам̣ дассенто випассисса бхагаватотиа̄дима̄ха. таттха вивидхам̣ пассатӣти випассӣ, вивичча пассатӣти ва̄ випассӣ, вивидхе аттаттхапараттха̄дибхеде аттхе пассатӣти ва̄ випассӣ, вивидхе воха̄рапараматтха̄дибхеде пассатӣти ва̄ випассӣ, тасса випассисса бодхийа̄ па̄дапуттаме уттаме бодхируккхаман̣д̣алама̄л̣аке пура̄н̣апулинам̣ ва̄лукам̣ чхад̣д̣етва̄ суддхам̣ пан̣д̣арам̣ пулинам̣ а̄кирим̣ сантхарим̣. сесам̣ сувин̃н̃еййамева̄ти.

пулинапӯджакаттхераапада̄наван̣н̣ана̄ саматта̄.