8. уттийаттхераапада̄наван̣н̣ана̄

чандабха̄га̄надӣтӣретиа̄дикам̣ а̄йасмато уттийаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто сиддхаттхасса бхагавато ка̄ле чандабха̄га̄надийам̣ сусума̄ро хутва̄ ниббатто надӣтӣрам̣ упагатам̣ бхагавантам̣ дисва̄ пасанначитто па̄рам̣ нетука̄мо тӣрасамӣпейева нипаджджи. бхагава̄ тасса анукампа̄йа пит̣т̣хийам̣ па̄де т̣хапеси. со тут̣т̣хо удагго пӣтивегена махусса̄хо хутва̄ сотам̣ чхинданто сӣгхена джавена бхагавантам̣ паратӣрам̣ неси. бхагава̄ тасса читтаппаса̄дам̣ н̃атва̄ ‘‘айам̣ ито чуто девалоке ниббаттиссати, тато пат̣т̣ха̄йа сугатӣсуйева сам̣саранто ито чатуннавутикаппе аматам̣ па̄пун̣иссатӣ’’ти бйа̄каритва̄ пакка̄ми.

со татха̄ сугатӣсуйева сам̣саранто имасмим̣ буддхуппа̄де са̄ваттхийам̣ ан̃н̃атарасса бра̄хман̣асса путто хутва̄ ниббатти, уттийотисса на̄мам̣ акам̣су. со вайаппатто ‘‘аматам̣ парийесисса̄мӣ’’ти парибба̄джако хутва̄ екадивасам̣ бхагавантам̣ дисва̄ упасан̇камитва̄ вандитва̄ дхаммам̣ сутва̄ пат̣иладдхасаддхо хутва̄ са̄сане паббаджитва̄ сӣладит̣т̣хӣнам̣ ависодхитатта̄ висесам̣ ниббаттетум̣ асакконто ан̃н̃ам̣ бхиккхум̣ висесам̣ ниббаттетва̄ ан̃н̃ам̣ бйа̄каронтам̣ дисва̄ саттха̄рам̣ упасан̇камитва̄ сан̇кхепена ова̄дам̣ йа̄чи. саттха̄пи тасса, ‘‘тасма̄тиха твам̣, уттийа, а̄димева висодхехӣ’’тиа̄дина̄ (сам̣. ни. 5.382) сан̇кхепенева ова̄дам̣ ада̄си. со саттху ова̄де т̣хатва̄ випассанам̣ а̄рабхи. тасса а̄раддхавипассакасса а̄ба̄дхо уппаджджи. уппанне а̄ба̄дхе джа̄тасам̣вего вӣрийа̄рамбхаваттхум̣ н̃атва̄ випассанам̣ вад̣д̣хетва̄ арахаттам̣ па̄пун̣и.

169. евам̣ со катасамбха̄ра̄нурӯпена паттаарахаттапхало аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто чандабха̄га̄надӣтӣретиа̄дима̄ха. таттха чандабха̄га̄надӣтӣрети парисуддхапан̣д̣арапулинаталехи ча пабха̄сампаннапасаннамадхуродакапарипун̣н̣ата̄йа ча чандаппабха̄киран̣асассирӣка̄бха̄ надама̄на̄ саддам̣ курума̄на̄ гаччхатӣти чандабха̄га̄надӣ, тасса̄ чандабха̄га̄надийа̄ тӣре сусума̄ро ахосинти самбандхо. таттха сусума̄роти кхуддакамаччхагумбе кхан̣д̣а̄кхан̣д̣икам̣ каронто ма̄ретӣти сусума̄ро, чан̣д̣амаччхо кумбхӣлоти аттхо. сабходжанапасутоханти ахам̣ сабходжане сакагочаре пасуто бйа̄ват̣о. надӣтиттхам̣ агаччхаханти бхагавато а̄гаманака̄ле ахам̣ надӣтиттхам̣ агаччхим̣ паттомхи.

170. сиддхаттхо тамхи самайети тасмим̣ мама титтхагаманака̄ле сиддхаттхо бхагава̄ аггапуггало саббасаттесу джет̣т̣хо сет̣т̣хо сайамбхӯ сайамева бхӯто джа̄то буддхабхӯто со бхагава̄ надим̣ таритука̄мо надӣтӣрам̣ упа̄гами.

172. петтикам̣ висайам̣ майханти майхам̣ питупита̄маха̄дӣхи парампара̄нӣтам̣, йадидам̣ сампаттасампаттамаха̄нубха̄ва̄нам̣ таран̣анти аттхо.

173. мама уггаджджанам̣ сутва̄ти майхам̣ уггаджджанам̣ а̄ра̄дханам̣ сутва̄ маха̄муни бхагава̄ абхирухӣти самбандхо. сесам̣ утта̄наттхамева̄ти.

уттийаттхераапада̄наван̣н̣ана̄ саматта̄.