6. дхӯпада̄йакаттхераапада̄наван̣н̣ана̄

сиддхаттхасса бхагаватотиа̄дикам̣ а̄йасмато дхӯпада̄йакаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто сиддхаттхасса бхагавато ка̄ле кулагехе ниббатто сиддхаттхе бхагавати читтам̣ паса̄детва̄ тасса бхагавато гандхакут̣ийам̣ чандана̄гарука̄л̣а̄нуса̄риа̄дина̄ катехи анекехи дхӯпехи дхӯпапӯджам̣ ака̄си. со тена пун̃н̃ена девесу ча мануссесу ча убхайасампаттийо анубхаванто ниббаттаниббаттабхаве пӯджанӣйо хутва̄ имасмим̣ буддхуппа̄де екасмим̣ кулагехе ниббатто пун̃н̃асамбха̄ра̄нубха̄вена са̄сане паббаджитва̄ випассанам̣ вад̣д̣хетва̄ арахаттам̣ патва̄ катадхӯпапӯджа̄пун̃н̃атта̄ на̄мена дхӯпада̄йакаттхероти саббаттха па̄кат̣о. со паттаарахаттапхало аттано пуббакаммам̣ саритва̄ соманассаджа̄то пуббачарита̄пада̄нам̣ дассенто сиддхаттхасса бхагаватотиа̄дима̄ха. сиддхо парипун̣н̣о саббан̃н̃утан̃н̃а̄н̣а̄дигун̣асан̇кха̄то аттхо пайоджанам̣ йасса бхагавато сойам̣ сиддхаттхо, тасса сиддхаттхасса бхагавато бхагйа̄дигун̣авантасса локаджет̣т̣хасса сакалалокуттамасса та̄дино ит̣т̣ха̄нит̣т̣хесу та̄дисасса ачаласабха̄васса̄ти аттхо. сесам̣ утта̄наттхамева̄ти.

дхӯпада̄йакаттхераапада̄наван̣н̣ана̄ саматта̄.