4. пан̃часӣласама̄да̄нийаттхераапада̄наван̣н̣ана̄

нагаре чандаватийа̄тиа̄дикам̣ а̄йасмато пан̃часӣласама̄да̄нийаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто аномадассисса бхагавато ка̄ле екасмим̣ куле ниббатто пуримабхаве ката̄кусалакамма̄нурӯпена далиддо хутва̄ аппаннапа̄набходжано паресам̣ бхатим̣ катва̄ джӣванто сам̣са̄ре а̄дӣнавам̣ н̃атва̄ паббаджитука̄мопи паббаджджам̣ алабхама̄но аномадассисса бхагавато са̄вакасса нисабхаттхерасса сантике пан̃ча сиккха̄пада̄ни сама̄дийи. дӣгха̄йукака̄ле уппаннатта̄ вассасатасахасса̄ни сӣлам̣ парипа̄леси. тена каммена со девамануссесу сам̣саранто имасмим̣ буддхуппа̄де веса̄лийам̣ маха̄бхогакуле ниббатто. ма̄та̄питаро сӣлам̣ сама̄дийанте дисва̄ аттано сӣлам̣ саритва̄ випассанам̣ вад̣д̣хетва̄ арахаттам̣ патва̄ паббаджи.

134. со аттано пуббакаммам̣ саритва̄ соманассаджа̄то уда̄навасена пуббачарита̄пада̄нам̣ пака̄сенто нагаре чандаватийа̄тиа̄дима̄ха. бхатако а̄сахам̣ тада̄ти тада̄ мама пун̃н̃акаран̣ака̄ле ахам̣ бхатако бхатийа̄ каммака̄рако а̄сим̣ ахосим̣. паракамма̄йане йуттоти бхатийа̄ паресам̣ каммакаран̣е а̄йутто йоджито ока̄са̄бха̄вена сам̣са̄рато муччанаттха̄йа ахам̣ паббаджджам̣ на лабха̄ми.

135. махандхака̄рапихита̄ти махантехи килесандхака̄рехи пихита̄ сам̣вута̄ тхакита̄. тивидхаггӣхи д̣айхарети наракаггипетаггисам̣са̄раггисан̇кха̄техи тӣхи аггӣхи д̣айханти. ахам̣ пана кена упа̄йена кена ка̄ран̣ена висам̣йутто бхавеййанти аттхо.

136. деййадхаммо аннапа̄на̄дида̄таббайуттакам̣ ваттху майхам̣ наттхи, тасса̄бха̄вена ахам̣ вара̄ко дуккхито бхатако бхатийа̄ джӣванако йам̣нӯна̄хам̣ пан̃часӣлам̣ раккхеййам̣ парипӯрайанти пан̃часӣлам̣ сама̄дийитва̄ парипӯренто йам̣нӯна раккхеййам̣ са̄дхукам̣ бхаддакам̣ сундарам̣ катва̄ парипа̄леййанти аттхо.

148. сва̄хам̣ йасаманубхавинти со ахам̣ девамануссесу махантам̣ йасам̣ анубхавим̣ тесам̣ сӣла̄нам̣ ва̄хаса̄ а̄нубха̄вена̄ти аттхо. каппакот̣импи тесам̣ сӣла̄нам̣ пхалам̣ киттенто екакот̣т̣ха̄самева киттайе па̄кат̣ам̣ кареййанти аттхо. сесам̣ сувин̃н̃еййамева̄ти.

пан̃часӣласама̄да̄нийаттхераапада̄наван̣н̣ана̄ саматта̄.