4. удапа̄нада̄йакаттхераапада̄наван̣н̣ана̄

випассино бхагаватотиа̄дикам̣ а̄йасмато удапа̄нада̄йакаттхерасса апада̄нам̣. айампи тхеро пуримамуниваресу ката̄дхика̄ро анекесу бхавесу катапун̃н̃асан̃чайо випассисса бхагавато ка̄ле кулагехе ниббатто вуддхиппатто ‘‘па̄нӣйада̄нам̣ майа̄ да̄таббам̣, тан̃ча нирантарам̣ катва̄ паваттетум̣ ват̣т̣атӣ’’ти чинтетва̄ екам̣ кӯпам̣ кхана̄петва̄ удакасампаттака̄ле ит̣т̣хака̄хи чина̄петва̄ тхирам̣ катва̄ таттха ут̣т̣хитена удакена пун̣н̣ам̣ там̣ удапа̄нам̣ випассисса бхагавато ниййа̄деси. бхагава̄ па̄нӣйада̄на̄нисам̣садӣпакам̣ анумоданам̣ ака̄си. со тена пун̃н̃ена девамануссесу сам̣саранто ниббаттаниббаттат̣т̣ха̄не поккхаран̣ӣудапа̄напа̄нӣйа̄дисампанно сукхаманубхавитва̄ имасмим̣ буддхуппа̄де екасмим̣ куле ниббатто вуддхиманва̄йа саддхо пасанно паббаджитва̄ начирассева араха̄ ахоси.

18. со апарабха̄ге аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто випассино бхагаватотиа̄дима̄ха. таттха удапа̄но като майа̄ти удакам̣ пиванти еттха̄ти удапа̄но, кӯпапоккхаран̣ӣтал̣а̄ка̄наметам̣ адхивачанам̣. со удапа̄но кӯпо випассисса бхагавато аттха̄йа като кханитоти аттхо. сесам̣ утта̄наттхамева̄ти.

удапа̄нада̄йакаттхераапада̄наван̣н̣ана̄ саматта̄.