5. сӣха̄санада̄йакаттхераапада̄наван̣н̣ана̄

ниббуте локана̄тхамхӣтиа̄дикам̣ а̄йасмато сӣха̄санада̄йакаттхерасса апада̄нам̣. айампи пуримабуддхесу ката̄дхика̄ро таттха таттха бхаве нибба̄на̄дхигаматтха̄йа катапун̃н̃ӯпачайо падумуттарасса бхагавато ка̄ле гахапатикуле ниббатто вин̃н̃утам̣ патто саттху дхаммадесанам̣ сутва̄ ратанаттайе пасанно тасмим̣ бхагавати париниббуте саттахи ратанехи кхачитам̣ сӣха̄санам̣ ка̄ра̄петва̄ бодхируккхам̣ пӯджеси, бахӯхи ма̄ла̄гандхадхӯпехи ча пӯджеси.

21. со тена пун̃н̃ена девамануссесу сам̣саранто убхайасампаттийо анубхавитва̄ саббаттха пӯджито имасмим̣ буддхуппа̄де са̄ваттхийам̣ кулагехе ниббатто вуддхиппатто гхара̄ва̄сам̣ васанто саттху дхаммадесанам̣ сутва̄ пасаннама̄насо н̃а̄тиваггам̣ паха̄йа паббаджито начирассева араха̄ хутва̄ пуббӯпачитакусаласамбха̄рам̣ саритва̄ сан̃джа̄тасоманассо пуббачарита̄пада̄нам̣ пака̄сенто ниббуте локана̄тхамхӣтиа̄дима̄ха. таттха сӣха̄санамада̄саханти сӣхарӯпахиран̃н̃асуван̣н̣аратанехи кхачитам̣ а̄санам̣ сӣха̄санам̣, сӣхасса ва̄ абхӣтасса бхагавато нисинна̄рахам̣, сӣхам̣ ва̄ сет̣т̣хам̣ уттамам̣ а̄сананти сӣха̄санам̣, там̣ ахам̣ ада̄сим̣, бодхируккхам̣ пӯджесинти аттхо. сесам̣ сувин̃н̃еййамева̄ти.

сӣха̄санада̄йакаттхераапада̄наван̣н̣ана̄ саматта̄.