3. раттипуппхийаттхераапада̄наван̣н̣ана̄

мигалуддо пуре а̄синтиа̄дикам̣ а̄йасмато раттипуппхийаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто випассисса бхагавато ка̄ле неса̄дакуле уппанно мигавадха̄йа аран̃н̃е вичарама̄но тасса ка̄рун̃н̃ена аран̃н̃е чарама̄нам̣ випассим̣ бхагавантам̣ дисва̄ пасаннама̄насо пуппхитам̣ раттикам̣ на̄ма пуппхам̣ кут̣аджапуппхан̃ча саха ван̣т̣ена очинитва̄ соманассачиттена пӯджеси. бхагава̄ анумоданам̣ катва̄ пакка̄ми.

13. со тенева пун̃н̃ена девамануссесу сам̣саранто убхайасампаттийо анубхавитва̄ имасмим̣ буддхуппа̄де кулагехе ниббатто вин̃н̃утам̣ патто ратанаттайе пасанно саттху дхаммадесанам̣ сутва̄ ка̄месу а̄дӣнавам̣ дисва̄ паббаджитва̄ начирассева арахаттам̣ патто аттано пуббакаммам̣ саритва̄ ‘‘неса̄дабхӯтена майа̄ катакусалам̣ сундара’’нти соманассаджа̄то пуббачарита̄пада̄нам̣ пака̄сенто мигалуддо пуре а̄синтиа̄дима̄ха. таттха мига̄нам̣ луддо са̄хасико ма̄ракоти мигалуддо, мигесу ва̄ луддо лобхӣти мигалуддо, неса̄до а̄сим̣ пурети аттхо.

14. раттикам̣ пуппхитам̣ дисва̄ти падумапуппха̄дӣни анека̄ни пуппха̄ни сӯрийарам̣сисампхассена дива̄ пуппханти раттийам̣ макул̣ита̄ни хонти. джа̄тисуманамаллика̄дӣни анека̄ни пуппха̄ни пана раттийам̣ пуппханти но дива̄. тасма̄ раттийам̣ пуппханато раттипуппхана̄мака̄ни анека̄ни сугандхапуппха̄ни ча кут̣аджапуппха̄ни ча гахетва̄ пӯджесинти аттхо. сесам̣ утта̄наттхамева̄ти.

раттипуппхийаттхераапада̄наван̣н̣ана̄ саматта̄.