2. тамбапуппхийаттхераапада̄наван̣н̣ана̄

паракамма̄йане йуттотиа̄дикам̣ а̄йасмато тамбапуппхийаттхерасса апада̄нам̣. айампи а̄йасма̄ пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто пийадассисса бхагавато ка̄ле кеначи пуре катена акусалакаммена дуггатакуле ниббатто вуддхиппатто паресам̣ каммам̣ катва̄ бхатийа̄ джӣвикам̣ каппеси. со евам̣ дуккхена васанто паресам̣ апара̄дхам̣ катва̄ маран̣абхайена пала̄йитва̄ ванам̣ па̄виси. таттха гатат̣т̣ха̄не па̄т̣алибодхим̣ дисва̄ вандитва̄ саммаджджитва̄ екасмим̣ руккхе тамбаван̣н̣ам̣ пуппхам̣ дисва̄ там̣ саббам̣ кан̣н̣ике очинитва̄ бодхипӯджам̣ ака̄си. таттха читтам̣ паса̄детва̄ вандитва̄ паллан̇кама̄бхуджитва̄ нисӣди. тасмим̣ кхан̣е те манусса̄ пада̄нупадикам̣ анубандхитва̄ таттха агамам̣су. со те дисва̄ бодхим̣ а̄ваджджентова пала̄йитва̄ бхайа̄наке гӣридуггапапа̄те патитва̄ мари.

7. со бодхипӯджа̄йа ануссаритатта̄ тенева пӣтисоманассена та̄ватим̣са̄дӣсу упапанно чха ка̄ма̄вачарасампаттим̣ анубхавитва̄ мануссесу ча чаккаваттиа̄дисампаттим̣ анубхавитва̄ имасмим̣ буддхуппа̄де вибхавасампанне куле ниббатто вуддхиппатто саттху дхаммадесанам̣ сутва̄ пасаннама̄насо паббаджитва̄ начирассева араха̄ хутва̄ аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто паракамма̄йане йуттотиа̄дима̄ха. таттха паресам̣ камма̄ни паракамма̄ни, паракамма̄нам̣ а̄йане каран̣е ва̄хане дха̄ран̣е йутто йоджито ахосинти аттхо. сесам̣ па̄кат̣амева̄ти.

тамбапуппхийаттхераапада̄наван̣н̣ана̄ саматта̄.