10. кумудада̄йакаттхераапада̄наван̣н̣ана̄

химавантасса̄видӯретиа̄дикам̣ а̄йасмато кумудада̄йакаттхерасса апада̄нам̣. айампи тхеро пуримабуддхесу ката̄дхика̄ро анекесу бхавесу виват̣т̣ӯпаниссайа̄ни пун̃н̃а̄ни упачинанто падумуттарасса бхагавато ка̄ле химавантасса а̄санне маханте джа̄тассаре кукуттхо на̄ма паккхӣ хутва̄ ниббатто кеначи акусалена паккхӣ сама̄нопи пуббе катасамбха̄рена буддхисампанно пун̃н̃а̄пун̃н̃есу чхеко сӣлава̄ па̄н̣агочарато пат̣ивирато ахоси. тасмим̣ самайе падумуттаро бхагава̄ а̄ка̄сена̄гантва̄ тасса самӣпе чан̇камати. атха со сакун̣о бхагавантам̣ дисва̄ пасанначитто кумудапуппхам̣ д̣ам̣ситва̄ бхагавато па̄дамӯле пӯджеси. бхагава̄ тасса соманассуппа̄данаттхам̣ пат̣иггахетва̄ анумоданамака̄си.

51. со тена пун̃н̃ена девамануссесу убхайасампаттисукхам̣ анубхавитва̄ имасмим̣ буддхуппа̄де са̄ваттхийам̣ ан̃н̃атарасмим̣ куле ниббатто вуддхиманва̄йа махаддхано маха̄бхого ратанаттайе пасанно саттху дхаммадесанам̣ сутва̄ пат̣иладдхасаддхо паббаджитва̄ начирассева араха̄ хутва̄ аттано пуббакаммам̣ паччаккхато н̃атва̄ соманассаджа̄то пуббачарита̄пада̄нам̣ пака̄сенто химавантасса̄видӯретиа̄дима̄ха. падумуппаласан̃чханноти еттха сатапаттехи сампун̣н̣о сетападумо ча тӣн̣и нӣлараттасетуппала̄ни ча падумуппала̄ни техи сан̃чханно гаханӣбхӯто сампун̣н̣о маха̄джа̄тассаро ахӯти самбандхо. пун̣д̣арӣкасамоттхат̣оти пун̣д̣арӣкехи раттападумехи оттхат̣о сампун̣н̣оти аттхо. сесам̣ сувин̃н̃еййамева̄ти.

кумудада̄йакаттхераапада̄наван̣н̣ана̄ саматта̄.

сол̣асамаваггаван̣н̣ана̄ саматта̄.