1. бандхуджӣвакаттхераапада̄наван̣н̣ана̄

чандам̣ва вималам̣ суддхантиа̄дикам̣ а̄йасмато бандхуджӣвакаттхерасса апада̄нам̣. айампа̄йасма̄ пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто сикхисса бхагавато ка̄ле кулагехе ниббатто вин̃н̃утам̣ патто гхара̄ва̄сам̣ сан̣т̣хапетва̄ васанто сикхисса бхагавато рӯпака̄йасампаттим̣ дисва̄ пасаннама̄насо бандхуджӣвакапуппха̄ни гахетва̄ бхагавато па̄дамӯле пӯджеси. бхагава̄ тасса читтаппаса̄давад̣д̣ханаттха̄йа анумоданамака̄си. со йа̄вата̄йутам̣ т̣хатва̄ тенева пун̃н̃ена девалоке ниббатто чха ка̄ма̄вачарасампаттийо анубхавитва̄ мануссесу ча чаккаваттиа̄дисампаттийо анубхавитва̄ имасса амха̄кам̣ самма̄самбуддхасса уппаннака̄ле гахапатикуле ниббатто рӯпаггайасаггаппатто саттху дхаммадесанам̣ сутва̄ саддха̄джа̄то гехам̣ паха̄йа паббаджито арахаттам̣ па̄пун̣и.

1. со пуббенива̄сан̃а̄н̣ена пуббе катакусалакаммам̣ ануссаритва̄ соманассаджа̄то пуббачарита̄пада̄нам̣ пака̄сенто чандам̣ва вималам̣ суддхантиа̄дима̄ха. таттха чандам̣ва вималам̣ суддханти аббха̄, махика̄, дхумо, раджо, ра̄хӯти имехи упаккилесамалехи вимуттам̣ чандам̣ ива дийад̣д̣хасахассупаккилесамала̄нам̣ пахӣнатта̄ вималам̣ никкилесатта̄ суддхам̣ пасаннам̣ сикхим̣ самбуддханти самбандхо. килесакаддама̄нам̣ абха̄вена ана̄вилам̣. нандӣбхавасан̇кха̄та̄йа балаваснеха̄йа парисамантато кхӣн̣атта̄ нандӣбхавапариккхӣн̣ам̣. тин̣н̣ам̣ локети локаттайато тин̣н̣ам̣ уттин̣н̣ам̣ атиккантам̣. висаттиканти висаттикам̣ вуччати тан̣ха̄, ниттан̣ханти аттхо.

2. нибба̄пайантам̣ джанатанти дхаммавассам̣ вассанто джанатам̣ джанасамӯхам̣ килесапарил̣а̄ха̄бха̄вена нибба̄пайантам̣ вӯпасаментам̣. сайам̣ сам̣са̄рато тин̣н̣ам̣, саббасатте сам̣са̄рато та̄райантам̣ атиккаментам̣ чатуннам̣ сачча̄нам̣ мунанато джа̄нанато муним̣ сикхим̣ самбуддханти самбандхо. ванасмим̣ джха̄йама̄нанти а̄рамман̣ӯпаниджджха̄налаккхан̣ӯпаниджджха̄нехи джха̄йантам̣ чинтентам̣ читтена бха̄вентам̣ ванамаджджхети аттхо. екаггам̣ екаггачиттам̣ сусама̄хитам̣ сут̣т̣ху а̄рамман̣е а̄хитам̣ т̣хапитачиттам̣ сикхим̣ муним̣ дисва̄ти самбандхо.

3. бандхуджӣвакапуппха̄нӣти бандхӯнам̣ н̃а̄тӣнам̣ джӣвакам̣ джӣвитаниссайам̣ хадайамам̣салохитам̣ бандхуджӣвакам̣ хадайамам̣салохитасама̄наван̣н̣ам̣ пуппхам̣ бандхуджӣвакапуппхам̣ гахетва̄ сикхино локабандхуно пӯджесинти аттхо. сесам̣ утта̄наттхамева̄ти.

бандхуджӣвакаттхераапада̄наван̣н̣ана̄ саматта̄.