5. мут̣т̣хипуппхийаттхераапада̄наван̣н̣ана̄

судассано на̄ма на̄мена̄тиа̄дикам̣ а̄йасмато мут̣т̣хипуппхийаттхерасса апада̄нам̣. айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто падумуттарасса бхагавато ка̄ле ма̄ла̄ка̄ракуле ниббатто вуддхиманва̄йа сакасиппе ниппхаттим̣ патто екадивасам̣ бхагавантам̣ дисва̄ пасаннама̄насо джа̄тисуманапуппха̄ни убхохи хаттхехи бхагавато па̄дамӯле окиритва̄ пӯджеси. со тена кусаласамбха̄рена девамануссесу сам̣саранто убхо сампаттийо анубхавитва̄ имасмим̣ буддхуппа̄де кулагехе ниббатто вуддхиппатто пуббава̄сана̄васена саттхари пасӣдитва̄ паббаджито начирассева араха̄ ахоси.

14-25. со апарабха̄ге аттано пуббакаммам̣ ануссаритва̄ соманассаджа̄то пуббачарита̄пада̄нам̣ пака̄сенто судассано на̄ма на̄мена̄тиа̄дима̄ха. таттха судассаноти а̄рохапарин̣а̄харӯпасан̣т̣ха̄найоббан̃н̃асобханена сундаро дассаноти судассано, на̄мена судассано на̄ма ма̄ла̄ка̄ро хутва̄ джа̄тисуманапуппхехи падумуттарам̣ бхагавантам̣ пӯджесинти аттхо. сесам̣ саббаттха утта̄намева̄ти.

мут̣т̣хипуппхийаттхераапада̄наван̣н̣ана̄ саматта̄.